Германия федератив республикаси канцлери Ангела Меркель ва Россия президенти Владимир Путин 11 январь, шанба куни Кремлда музокаралар олиб борди. Икки давлат раҳбарининг уч соат давом этган музокараларда Ливия ва Эрондаги вазият, шунингдек, «Шимолий оқим - 2» газ қувури қурилиши муҳокама қилинди.
Хусусан, Меркель «Шимолий оқим - 2» лойиҳасини АҚШ санкцияларига қарамай давом эттириш лозимлигини таъкидлаган.
«АҚШ билан сиёсатдаги қарама-қаршиликларга қарамай ҳудудлараро санкциялар тўғри деб ҳисобламаймиз, шу сабабли ушбу лойиҳани қўллаб-қувватлашда давом этамиз», — деган Меркель.
Путин ўз навбатида, Россиянинг газ қувури қурилишини якунлаш ниятида экани, бу ишни хорижий ҳамкорлар ярдамида ёки уларнинг кўмагисиз ҳам амалга оширмоқчи эканини билдирди.
«Муаммо муддатларда эмас. Қурилишнинг якунланиши бир неча ойга кечикиши мумкин», — дея Владимир Путин сўзларини келтирган «Интерфакс».
Путин газ қувурининг қурилиши 2020 йил охиригача якунланиши ёки 2021 йил бошида тугашига умид қилишини айтди.
Икки давлат етакчилари Ливиядаги вазиятни ҳам муҳокама қилган.
«Бугун бир неча соатдан кейин Туркия президенти билан вазиятни муҳокама қилиб, Ливиядаги ҳарбий ҳаракатларни тўхтатиш борасида бир тўхтамга келишимизга умид қиламан», — деган Путин.
11 январда Путин Туркия президенти Ражаб Тоййиб Эрдўғон билан телефон орқали мулоқот қилган ва суҳбат давомида Меркель билан учрашувдаги мавзулар ҳақида ҳам фикр алмашган.
Путин ҳамда Меркель Эроннинг ядро келишуви ҳақида суҳбат қуриб, Путин ушбу келишувни нафақат минтақа балки бутун дунё учун муҳим аҳамиятга эга битим эканини қайд этган. Россия ва Германия Эроннинг ядро келишувига амал қилиши юзасидан зарур ҳаракатларни амалга оширади.
Ангела Меркель аввал 2018 йил май ойида Россияга расмий ташриф билан келган. Ўшанда у Владимир Путин билан Сочида музокаралар олиб борган.
2018 йил октябрида Меркель ҳукмрон партия раҳбарлигидан кетаётгани ва 2021 йилда бўлиб ўтадиган сайловларда канцлерлик учун номзодини қўймаслигини маълум қилган.
Изоҳ (0)