10-yanvar kuni “Chendu—Toshkent—Chendu” birinchi charter reysi yo‘lga qo‘yildi. Ushbu charter reysda 90 milliondan ziyod aholi istiqomat qiluvchi Sichuan provinsiyasining ommaviy axborot vositalari hamda turoperatorlar vakillari Toshkentga tashrif buyurdi. Bu haqda Turizmni rivojlantirish davlat qo‘mitasi axborot xizmati xabar bergan.
Reysning “Zhejang Loong Airlines Co.Ltd” prezidenti Lyu I boshchiligidagi ilk mehmonlari Toshkent xalqaro aeroportida tantanali ravishda kutib olindi.
“2020-yilning 1-yanvaridan Xitoy fuqarolari uchun vizasiz rejimning joriy qilinishi natijasida juda ko‘p xitoyliklar O‘zbekistonga kela boshlaydi. Shu bilan birga, “LoongAir” kompaniyasi Xitoy ommaviy axborot vositalari bilan yaqindan hamkorlik qilib, ularni O‘zbekiston bilan yaqindan tanishtirishni maqsad qilgan. O‘ylaymanki, yaqin orada ushbu safar natijalari albatta namoyon bo‘ladi”, — dedi aviakompaniya prezidenti Lyu I.
Ma’lumot uchun, “LoongAir” kompaniyasi 2011-yilda tashkil topgan. Aviakompaniya 46 havo kemasi va 3 yuk samolyotiga ega. Kompaniya 14 xalqaro va hududiy yo‘nalishlar bo‘yicha 269 yo‘lovchi va yuk tashish yo‘nalishini ochgan.
“Zhejang Loong Airlines Co.Ltd” aviakompaniyasining ilk charter reysi — “Sian—Toshkent—Sian” 2019-yil 27-sentabr kuni amalga oshirilgan. Shuningdek, ayni damda XXRning Guanchjou shahridan ham aviareyslarni yo‘lga qo‘yish ustida ish olib borilmoqda.
Izoh (0)