10 январь куни «Ченду—Тошкент—Ченду» биринчи чартер рейси йўлга қўйилди. Ушбу чартер рейсда 90 миллиондан зиёд аҳоли истиқомат қилувчи Сичуан провинциясининг оммавий ахборот воситалари ҳамда туроператорлар вакиллари Тошкентга ташриф буюрди. Бу ҳақда Туризмни ривожлантириш давлат қўмитаси ахборот хизмати хабар берган.
Рейснинг «Zhejang Loong Airlines Co.Ltd» президенти Лю И бошчилигидаги илк меҳмонлари Тошкент халқаро аэропортида тантанали равишда кутиб олинди.
«2020 йилнинг 1 январидан Хитой фуқаролари учун визасиз режимнинг жорий қилиниши натижасида жуда кўп хитойликлар Ўзбекистонга кела бошлайди. Шу билан бирга, «LoongAir» компанияси Хитой оммавий ахборот воситалари билан яқиндан ҳамкорлик қилиб, уларни Ўзбекистон билан яқиндан таништиришни мақсад қилган. Ўйлайманки, яқин орада ушбу сафар натижалари албатта намоён бўлади», — деди авиакомпания президенти Лю И.
Маълумот учун, «LoongAir» компанияси 2011 йилда ташкил топган. Авиакомпания 46 ҳаво кемаси ва 3 юк самолётига эга. Компания 14 халқаро ва ҳудудий йўналишлар бўйича 269 йўловчи ва юк ташиш йўналишини очган.
«Zhejang Loong Airlines Co.Ltd» авиакомпаниясининг илк чартер рейси — «Сиан—Тошкент—Сиан» 2019 йил 27 сентябрь куни амалга оширилган. Шунингдек, айни дамда ХХРнинг Гуанчжоу шаҳридан ҳам авиарейсларни йўлга қўйиш устида иш олиб борилмоқда.
Изоҳ (0)