Turizmni rivojlantirish davlat qo‘mitasi tomonidan O‘zbekistonda xorijiy sayyohlar keladigan va chet ellik turistlarni qabul qiladigan ziyoratgohlar soni ro‘yxatga olingan. Ular 100 ga yaqin bo‘lib, bu muqaddas qadamjolarda nafaqat islom, balki xristian, buddaviylik, yahudiylik diniga e’tiqod qiluvchilar ham ziyorat qilish imkoniga ega. Ro‘yxati shakllantirilgan ziyoratgohlarning aksariyati Xiva, Samarqand, Buxoro shaharlariga to‘g‘ri keladi.
Turizmni rivojlantirish davlat qo‘mitasi tomonidan 10-yanvar kuni tashkil etilgan brifingda Ta’lim, fan va madaniyat masalalari bo‘yicha islom tashkiloti (ISESCO) Buxoro shahrini 2020-yilda islom olami madaniyati poytaxti, deb e’lon qilgani borasida ma’lumot berildi.
“2019-yilda ziyorat turizmi konferensiyasining natijasi samarali bo‘ldi. O‘rganishlar shuni ko‘rsatdiki, forumga tashrif buyurgan turli mehmonlar juda ko‘plab sayyohlarni O‘zbekistonga yuborgan. Har bittasi bilan aloqaga chiqib o‘rgandik. Forumning yordamchi natijalari ham juda ko‘p bo‘ldi. Deylik, turizm sohasiga investitsiya kiritganlar, turizm sohasida mehmonxonalarni boshqaruviga olgan va universitetlar, talabalar bilan ilmiy-amaliy anjumanlarni o‘tkazish holatlari ham kuzatildi”, — dedi Turizmni rivojlantirish davlat qo‘mitasi Ziyorat turizmi bo‘limi boshlig‘i Saidkomil Xolxo‘jayev.
Tashkilot vakili bu borada joriy yilda amalga oshiriladigan ayrim rejalarga ham to‘xtalib o‘tdi.
“2019-yilda Buxoro shahrida o‘tkazilgan I Xalqaro ziyorat turizmi forumini 2020-yil yanada kengroq formatda — O‘zbekiston Ziyorat turizmi haftaligi shaklida o‘tkazishni rejalashtirdik. Bu tadbirlar nafaqat Buxoro shahrida, balki Samarqand, Toshkent shaharlarida ham bo‘ladi, turli yo‘nalishlardagi sohalarga oid tadbirlarni qamrab oladi. Haftalik doirasida O‘zbekiston islom merosini o‘rganish va uni ziyorat turizmi orqali targ‘ib qilishga bag‘ishlangan ilmiy anjuman ham tashkil qilinadi. Unda xalqaro miqyosda tanilgan turli islom ulamolari qatnashishi kutilyapti”, — dedi Xolxo‘jayev.
Bundan tashqari, Singapur bilan hamkorlikda “Halal and Travel” konferensiyasini o‘tkazish ham rejalashtirilmoqda. Bu konferensiyada ziyorat turizmi va halol turizmga oid 20 dan ortiq ekspertlarni jalb qilgan holda sohani rivojlantirish va yangi trendlarni o‘rganish, ular bilan o‘rtoqlashish ko‘zda tutilgan.
“Ziyorat turizmini targ‘ib qilishdan asosiy maqsad – turizm salohiyati va O‘zbekistonning islom sivilizatsiyasi markazi ekanini dunyoga yoyish hisoblanadi. Bugungi kunda jahonda musulmonlar sonining o‘sishi barobarida islom tarixi va islom merosiga bo‘lgan qiziqish ham ortib boryapti. Ko‘proq Yevropa va janubiy-sharqiy Osiyodagi musulmonlarda qiziqish uyg‘onmoqda.
Shu orqali biz O‘zbekistonning islom olamida tutgan o‘rnini, buyuk mutafakkirlarimizning nafaqat islom, balki jahon sivilizatsiyasiga qo‘shgan hissasini ko‘rsata olamiz. Avvalambor, o‘zimiz o‘rganishimiz va boshqalarga tanishtirishimiz orqali kimligimizni e’tirof etishga erishamiz”, — dedi Saidkomil Xolxo‘jayev.
Izoh (0)