Amerikaning eng yirik va eng qadimgi sut ishlab chiqaruvchi kompaniyalaridan biri Borden Dairy bankrot bo‘lganini e’lon qildi. Bu haqda Bloomberg agentligiga tayanib Spot xabar bermoqda.
Kompaniya bunga o‘simlik suti iste’moli ortgani sharoitida sigir sutiga talabning pasayganini sabab qilib ko‘rsatgan. Ya’ni xaridorlar an’anaviy sigir suti o‘rniga o‘simlikdan tayyorlangan sut sotib ola boshlagan.
Qayd etilishicha, bu ikki oy ichida o‘simlik suti sababli xonavayron bo‘lgan AQShdagi sut ishlab chiqaruvchi ikkinchi yirik kompaniya. Bundan avval sut mahsulotlari ishlab chiqaruvchi Dean Foods kompaniyasi bankrot bo‘lganini e’lon qilgan.
Borden Dairy kompaniyasining bankrotlik to‘g‘risidagi arizasida aytilshicha, raqobat bosimi, mahsulot iste’moli va daromadning pasayishi uni qarzga botirgan bo‘lib, uning miqdori 500 million dollarga baholanmoqda.
Kompaniya moliyaviy direktori Jeyson Monakoning ta’kidlashicha, bozorda sutning o‘rnini bosuvchi o‘simlikdan tayyorlangan mahsulot shov-shuvli paydo bo‘lishi bilan bir qatorda sigir suti narhining ko‘tarilayotgani kompaniya mahlulotlariga bo‘lgan talabni susaytirgan.
Qayd etilishicha, kompaniya qayta tiklash rejasini ishlab chiqqunga qadar joriy hisob-kitoblarni va operatsiyalarni odatdagidek davom ettirish niyatida.
So‘nggi yillarda dunyoda sog‘lom ovqatlanish trendi ommalashmoqda. Gap faqat an’anaviy sutga muqobil o‘simlik suti haqida emas, balki tezkor ovqatlanish restoranlari tarmog‘i menyulariga kirita boshlagan vegetarianlar mahsuloti va sun’iy go‘sht haqida ham ketmoqda.
Ma’lumot uchun, o‘simlik suti soya, bodom, guruch, suli, kokos yong‘og‘i, ko‘knor va boshqa o‘simliklardan olinadi. Uning tarkbida laktoza va kazein yo‘q. Bu esa ushbu moddalarga toqati bo‘lmagan odamlar ham ichishi mumkinligini anglatadi. Shuningdek, unda xolesterin ham yo‘q bo‘lib, parhez tutuvchilar uchun muhim ahamiyatga ega.
Izoh (0)