Американинг энг йирик ва энг қадимги сут ишлаб чиқарувчи компанияларидан бири Borden Dairy банкрот бўлганини эълон қилди. Бу ҳақда Bloomberg агентлигига таяниб Spot хабар бермоқда.
Компания бунга ўсимлик сути истеъмоли ортгани шароитида сигир сутига талабнинг пасайганини сабаб қилиб кўрсатган. Яъни харидорлар анъанавий сигир сути ўрнига ўсимликдан тайёрланган сут сотиб ола бошлаган.
Қайд этилишича, бу икки ой ичида ўсимлик сути сабабли хонавайрон бўлган АҚШдаги сут ишлаб чиқарувчи иккинчи йирик компания. Бундан аввал сут маҳсулотлари ишлаб чиқарувчи Dean Foods компанияси банкрот бўлганини эълон қилган.
Borden Dairy компаниясининг банкротлик тўғрисидаги аризасида айтилшича, рақобат босими, маҳсулот истеъмоли ва даромаднинг пасайиши уни қарзга ботирган бўлиб, унинг миқдори 500 миллион долларга баҳоланмоқда.
Компания молиявий директори Жейсон Монаконинг таъкидлашича, бозорда сутнинг ўрнини босувчи ўсимликдан тайёрланган маҳсулот шов-шувли пайдо бўлиши билан бир қаторда сигир сути нарҳининг кўтарилаётгани компания маҳлулотларига бўлган талабни сусайтирган.
Қайд этилишича, компания қайта тиклаш режасини ишлаб чиққунга қадар жорий ҳисоб-китобларни ва операцияларни одатдагидек давом эттириш ниятида.
Сўнгги йилларда дунёда соғлом овқатланиш тренди оммалашмоқда. Гап фақат анъанавий сутга муқобил ўсимлик сути ҳақида эмас, балки тезкор овқатланиш ресторанлари тармоғи менюларига кирита бошлаган вегетарианлар маҳсулоти ва сунъий гўшт ҳақида ҳам кетмоқда.
Маълумот учун, ўсимлик сути соя, бодом, гуруч, сули, кокос ёнғоғи, кўкнор ва бошқа ўсимликлардан олинади. Унинг таркбида лактоза ва казеин йўқ. Бу эса ушбу моддаларга тоқати бўлмаган одамлар ҳам ичиши мумкинлигини англатади. Шунингдек, унда холестерин ҳам йўқ бўлиб, парҳез тутувчилар учун муҳим аҳамиятга эга.
Изоҳ (0)