“Urdim, lekin bu darajada emas”. Madina Muxtorovaning ukasini urganligi aytilayotgan o‘g‘li intervyu berdi (video)

Aktrisa Madina Muxtorovaning kenja o‘g‘li 13 yoshli Mirfayzni kaltaklagani aytilgan o‘rtancha o‘g‘li Sanjar Muxtorov bloger Shuhrat Musayevga intervyu berdi hamda ijtimoiy tarmoqlar foydalanuvchilarini qiziqtirayotgan ko‘plab savollarga javob berdi.

Suhbat chog‘ida Sanjar Muxtorov ukasini uning foydasini ko‘zlab, tarbiyalash, to‘g‘ri yo‘lga solish maqsadida urganini aytadi:

“Ukam onamning mashinasini haydab chiqib ketib, borib daraxtga urdi. Mashina mayli temir, lekin o‘sha daraxtning o‘rnida odam bo‘lishi ham mumkin edi-ku?

Urish masalasiga kelsak, men uni tarbiyaga chaqiraman, hatto bir shapaloq tushirishim mumkin. Bunga haqqim bormi?

Yoshligimizda adam, akam meni ham tarbiyalash maqsadida kamar bilan kaltaklagan paytlar bo‘lgan. Bunday jazodan keyin o‘sha nomaqbul ishni qaytib qilmaydigan bo‘lganman. Lekin bu gapim bilan bolalarni urish kerak, demayman. Ukamga tarsaki tushirganim rost, lekin birinchi videoda bo‘rttirish bo‘lgan. Akamga u jazosini oldi, deb ko‘rsatish uchun grim qilishgan”, — deydi Sanjar Muxtorov.

Shuningdek, Sanjar Muxtorov ukasidan xavotir olgan barcha insonlarga quyidagicha murojaat qiladi:

“Men akaman. Nimaiki qilsam, ukamning foydasi uchun unga yaxshi bo‘lsin, deb qilaman. Ko‘chada sigaret chekishi, mashinani haydab chiqib ketishi, onamni qiynashi kabi yomon odatlarini tashlashi uchun, ertaga qamalib ketmasligi uchun. Urmadim emas, urdim. Lekin bu darajada emas. Shu bolaning kelajagi uchun, ertaga yaxshi bola bo‘lib ulg‘ayishi uchun. O‘zimning ham ikki nafar farzandim—ikki qizim bor. Bu bola mening ukam, jigarim. Men hech qachon uning  qiynalishini, uning qamalib ketishini xohlamayman”.

Aktrisa Madina Muxtorovaning bir o‘g‘li boshqa o‘g‘li tomonidan kaltaklanishi holati so‘nggi kunlarda eng ko‘p muhokama qilingan mavzu bo‘ldi.

Ushbu holat yuzasidan 4-yanvar kuni Yunusobod tumani IIB FMBda jurnalist va blogerlar uchun brifing tashkil etildi. Brifingda aktrisa Madina Muxtorova ishtirok etdi hamda keng jamoatchilikni qiziqtirgan ko‘plab savollarga javob berdi. Xususan, u o‘g‘lini o‘zi urgani, ona sifatida bunga haqqi borligini aytdi.

Tadbirda Yunusobod tumani prokurori Habibulla Mirsoatov 13 yoshli bolaning kaltaklanishi holati yuzasidan jinoyat ishi ochilganini aytib o‘tdi. Shuningdek Yunusobod tumani hokimligi vasiylik va homiylik organi mutaxassisi Muxlisa Qosimova Madina Muxtorova onalik huquqidan mahrum etilishi mumkinligini ta’kidladi.

Avvalroq aktrisa Madina Muxtorova va o‘g‘li Mirfayz bilan suhbat uyushtirilgan edi. Suhbat chog‘ida Madina Muxtorova 13 yoshli o‘g‘lining nima sababdan kaltaklanganiga aniqlik kiritgan.