“Namoz o‘qib harom ish qiladiganlar ko‘payib ketdi”. Munisa Rizayeva Madina Muxtorovaning o‘g‘li kaltaklanishi yuzasidan videomurojaat yo‘lladi

Taniqli aktrisa Madina Muxtorovaning 13 yoshli o‘g‘li M.O.ning oila a’zolari tomonidan muttasil kaltaklanib kelishi aks etgan video ijtimoiy tarmoqlarda tarqalganidan so‘ng, ushbu holat internet foydalanuvchilari hamda o‘zbek shou-biznesi vakillari o‘rtasida keng muhokamalarga sabab bo‘lmoqda.

Xususan, xonandalar Munisa Rizayeva va Hilola Hamidova ushbu holatdan qattiq ta’sirlanganini hamda bolaning kelajagida xavotir olayotganini ma’lum qildi.

“Madina opa, iltimos, u bolani uyoqdan buyoqqa sudrab, hammaga shou ko‘rsatguncha, uni shifoxonaga yotqizinglar. Uning ichi to‘kilib bo‘libdi. Bunaqa qilib, sudrab yurib karate ko‘rsat, unday qil, bunday qil deb yuraversanglar, ertaga bolaga bir narsa bo‘ladi”, — deydi Hilola Hamidova.

“Bu videoni ko‘rib, tonggacha uxlolmadim, qon bosimim ko‘tarilib ketdi, hecham o‘zimga kela olmayapman. Hijobdagi kelinoyi akasini ukasiga qarshi gij-gijlab, bolani urdirtirganini hecham hazm qila olmayapman. Namoz o‘qib ham harom ish qiladiganlar ko‘payib ketdi. Hijob niqob ko‘pchilik uchun, mana shundan xafa bo‘lib ketyapman”, — deydi Munisa Rizayeva.

Ma’lumot uchun, Madina Muxtorovaning 13 yoshli kenja o‘g‘li boshqa o‘g‘li tomonidan kaltaklangani aks etgan video aktrisaning o‘zi tomonidan tasvirga olingan. Video internetda 2-yanvar kuni tarqaldi.

Ushbu holat yuzasidan 4-yanvar kuni Yunusobod tumani IIB FMBda jurnalist va blogerlar uchun brifing tashkil etildi. Brifingda aktrisa farzandini o‘zi urganini ma’lum qildi.

Hozirda ushbu holat yuzasidan jinoyat ishi qo‘zg‘atildi, aktrisa onalik huquqidan mahrum qilinishi mumkin.