“Bu — yangilanayotgan O‘zbekistonning yangi parlamenti emas. Bu — eski pocherk”

Markaziy saylov komissiyasi 6-yanvar kuni 2019-yilgi parlament saylovlarining umumiy yakunlarini e’lon qildi. Unga ko‘ra, O‘zLiDeP Oliy Majlis Qonunchilik palatasidan 53 ta, “Milliy tiklanish” 36 ta, “Adolat” 24 ta, O‘zXDP 22 ta va Ekopartiya 15 ta o‘rinni qo‘lga kiritgan — bu 2014-yilgi parlament saylovi natijalaridan ko‘p ham farq qilmaydi.

Yangi parlament haqida

Parlament saylovining yakuniy natijalari shuni ko‘rsatdiki, “avvalgi saylovlardan farqli o‘laroq” o‘tkazilgan saylov natijalari avvalgi saylov natijalaridan u darajada ham farqlanmadi.

Haqiqatan ham 100 kunlik saylov kampaniyasi odamlarda yangi parlamentga bo‘lgan qandaydir umid uyg‘otdi. Ammo saylangan deputatlar ro‘yxatini chuqurroq o‘rganish shuncha sa’y-harakatlar nechog‘li maqsadli bo‘ldi, degan savolni kun tartibiga olib chiqmoqda.

Harakatdan bir dumalab partiyaga aylangan Ekopartiya yana o‘sha 15 ta o‘ringa ega bo‘lgani, O‘zLiDeP ham, “Milliy tiklanish” ham o‘sha-o‘sha “rasklad”da qolgani shunday fikr bildirishga asos bo‘ladi. Bu xalqning xohish-irodasi natijasi deyishdan yiroqmiz.

O‘zbekiston minglab yangi-yangi yuzlarni kashf qilayotgan, amaldagi nomenklatura singari o‘ylamaydigan, yosh va ilg‘or fikrlaydigan kadrlar, “Buyuk kelajak” ekspertlari boshqaruvga faol jalb qilinayotgan bir paytda yangi parlamentimiz eski poydevor asosida undan-da zaif kadrlar bilan to‘ldirilgandek tuyulyapti.

Albatta, yangi parlament faoliyatiga baho berishga hali vaqtimiz bo‘ladi. Ammo bu parlament yangilanayotgan O‘zbekistonning yangi parlamenti emas. Bu eski pocherk.

Albatta, bularning barchasi shunchaki IMHO.

@davletovuz