Britaniya nashri nima uchun O‘zbekistonga sayohat qilish kerakligi haqida maqola e’lon qildi

Britaniyaning Inews nashrida nima uchun O‘zbekistonga sayohat qilish kerakligi haqidagi maqola chop etildi.

“O‘zbekiston 2020-yilda Buyuk Ipak yo‘lining qadimiy shaharlari, ajoyib  san’ati va ulug‘vor me’morchiligi bilan turistik ‘bum’ga tayyor. Ehtimol, siz boradigan joylar ro‘yxatida Markaziy Osiyo, yo‘qdir, lekin  u yer sayohat qilish uchun ayni muddaodir”, — deya boshlaydi Martin Kent o‘z maqolasini.

Maqolada O‘zbekiston jadal sur’atlar bilan o‘zgarib borayotgani, mamlakatda Buyuk Ipak yo‘lining qadimiy shaharlariga yanada ko‘proq sayyohlarni jalb qilish uchun qator islohotlar amalga oshirilayotgani haqida so‘z yuritilgan.

“Tezyurar temir yo‘l xizmatlari yaxshilanib, yangi aviakompaniyalar parvoz qilayotgan bir paytda aksariyat fuqarolar, jumladan, britaniyaliklar uchun ham vizalar talab qilinmaydi. O‘zbekistonda 2017-yildan 2018-yilgacha sayyohlar soni ikki baravarga ko‘payib, 5,3 million kishiga yetdi”, — deb yozadi muallif.

Shuningdek, poytaxt markaziga o‘rnatilgan Amir Temur haykali, uning yaqinida joylashgan “O‘zbekiston” mehmonxonasi tasvirlangan.

1977-yilda nozik did bilan qurilgan metro tarmog‘iga esa “suratkashlar orzusi” deya  ta’rif berilgan. Metrodagi yo‘l haqi, diqqatga sazovor bekatlar ham nazardan chetda qolmagan.

Maqolada Samarqand, Buxoro va Xiva shaharlariga ham to‘xtalib o‘tilgan.