Ijtimoiy tarmoqlarda Qashqadaryo viloyatining Koson tumanida yashovchi fuqaroning og‘ir ahvoldaligi aytilgan video tarqaldi. Videoda chiqish qilgan Husniddin Mirzayev 14 tonna g‘allasi hudud profilaktika inspektori tomonidan tortib olingani-yu, qizining nomusiga tegishga harakat bo‘lganidan shikoyat qiladi.
Voqea tafsilotlarini o‘rgangan “Daryo” muxbiri Otabek Qo‘ldoshevning voqeaga aniqlik kiritishicha, fuqaro Husniddin Mirzayev aka-ukalari bilan kelisholmaganligi sababli mojaro kelib chiqqan.
Ma’lum bo‘lishicha, tumanning “Beshqo‘ton” mahallasida yashovchi Husniddin Mirzayev ukalari — Odilbek, Nodirbek va Bahriddin Mirzayevlar bilan o‘zaro kelishmay qolgan.
Husniddin Mirzayevning “Daryo” muxbiriga ma’lumot berishicha, u 2016-yil “Majidov Normo‘min” fermer xo‘jaligini tashkil etib, 37 gektar yer maydonini olib, faoliyatini boshlagan. 2017-yil g‘alla ekib, davlat rejasini 102 foizga bajargan. 2018-yil esa 70 foizga, 2019-yilga kelganda esa Vazirlar Mahkamasi qaroriga muvofiq fermer xo‘jaliklari optimallashtiriladi va “Majidov Normo‘min” fermer xo‘jaligining 37 gektar yeri “Sherali” fermer xo‘jaligiga qo‘shib yuboriladi.
— G‘allani ekdim, parvarishladim, hosil yig‘adigan payt esa boshqalar ega chiqqani alamli bo‘ldi, — deydi Husniddin Mirzayev. – G‘alladan davlat rejasi 30 tonna edi, ammo mening 44 tonna g‘allamni olishdi. Zo‘ravonlik bilan olib qo‘yishdi. Bir xalta g‘alla ham berishmadi. “Uchastkavoy”ga bir xalta g‘alla bering, dedim. Ammo bermadi.
Ma’lum bo‘lishicha, Husniddin Mirzayev raisligidagi “Majidov Normo‘min” fermer xo‘jaligi 2019-yil “Sherali” fermer xo‘jaligi tarkibiga qo‘shilgach, 2019-yilning hosili ham “Sherali” fermer xo‘jaligi vakillari tomonidan yig‘ib olinadi. Bundan norozi bo‘lgan Husniddin Mirzayev g‘alla uchun mehnat qilganini aytib, o‘zi uchun ham olib qolishni so‘raydi.
— 44 tonna g‘allaning barchasini topshirasiz, bu tuman hokimining buyrug‘i deyishdi, — deydi Husniddin Mirzayev. – “Tepa”ning buyrug‘i dedi. Mayli, deb g‘allani topshirdik. Alamlisi, shuncha mehnat qilib, bir xalta g‘alla ham ololmadik.
Aniqlanishicha, Husniddin Mirzayev 2016-yil fermerlikni boshlagandan buyon fermer xo‘jalikda ishchi bo‘lib ishlovchi ukalari bilan kelishmaydi. Har doim urush-janjal qilib keladi. Buni Husniddin Mirzayevning marhum onasi Meylixol Berdiyorovaning 2018-yil 30-iyundagi O‘zbekiston Prezidentiga yozgan shikoyat arizasidan ham bilish mumkin.
Meylixol Berdiyorova o‘z murojaatnomasida o‘g‘li Husniddin Mirzayev ukalari bilan kelishmayotganini, oilaga tegishli fermer xo‘jalikni 2016-yil o‘g‘li Husniddin Mirzayevga berib xato qilganini yozadi va yerni qaytarib olishda ko‘mak so‘raydi.
Husniddin Mirzayev esa ukalari Nodirbek, Odilbek va Bahriddin Mirzayevlar fermer xo‘jaligi tashkil etilganidan beri u bilan murosa qilmayotganidan noliydi.
— Eng yomoni, o‘g‘limni yotqizib, bo‘yniga “lapatka” tirashdi. So‘yib tashlashga urindi, — deydi Husniddin Mirzayev ukalaridan shikoyat qilar ekan. — Bir kuni kechasi tashqarida yursam, qizimning baqirgan ovozi eshitildi, onasi bilan yugurib bordik. Borsak, qizimni yechintirishga urinib, ko‘ylaklarini yechib tashlagan Nodirbek Mirzayev qizimni kameraga olyapti. Zo‘rlamoqchi bo‘lgan. Bu haqda hudud profilaktika inspektoriga shikoyat qildim. Biror nima qildimi, deb so‘raydi. Biror narsa qilishi shartmi? Shunday ko‘ngilsiz voqeaning oldini olishimiz kerakmasmi aslida.
“Daryo” muxbiri bilan suhbatlashgan Odilbek Mirzayev hamda Nodirbek Mirzayevlar akasi ularni jiyanlarini urganlikda va qizining nomusiga tegishi haqidagi aybloviga javob berar ekan shunday deydi:
— Akam bilan 2016-yilgacha birga yashaganmiz, farzandlari esa jigarimiz. Aytingchi, inson o‘z jigarini o‘ldirishga harakat qilishi yoki qiz jiyanining nomusiga tegishga urinishi mumkinmi? – deydi Odilbek Mirzayev. – Axir ular bizning jigarlarimiz, akam o‘z manfaati uchun har qanday ayblovdan tonmayapti. Bu nafaqat biz uchun, oilamiz sha’ni uchun ham sharmandali holat-ku. Onam ham akamning shunday qilmishlariga chidolmay ko‘z yumdi. Hatto onasining ma’rakasiga kelmagan farzand jigarlarini ham ayamasligini isbot qilyapti.
Odilbek Mirzayevning ma’lumot berishicha, Husniddin Mirzayev tortib olishdi deyotgan 14 tonna g‘allaning 9 tonnasi ularga berilgan. Qolgan 5 tonna g‘alla esa “Majidov Normo‘min” fermer xo‘jaligining 2018-yildagi qarzdorligini yopish uchun ishlatilgan.
— 2019-yil 26-may kuni meni urib, boshimga “lapatka” bilan tushirib qulog‘imni yirtib yuborishdi, ko‘zimni ko‘r qilishdi, — deydi Husniddin Mirzayev. — Toshkentga borib, ekspertizadan o‘tib keldim. Ammo prokuratura bu jinoyatni yopyapti. Jinoyat alomati yo‘q deb yopyapti.
Husniddin Mirzayevning ukalari esa bu fikrni rad etmoqda.
— Akamning “urib ko‘zimni ko‘r qilishdi”, — degan gapi ham uydirma, — deydi Odilbek Mirzayev. – Ko‘zlaridagi nuqson yoshligida orttirilgan. Buni uydagilar — aka-ukalarimiz va opalarim tasdiqlashadi.
Ushbu holat ijtimoiy tarmoqlarda tarqalgach, Koson tuman hokimligi axborot xizmati ham vaziyatni o‘rganadi va quyidagicha fikr beradi:
“Koson tumani “Beshqo‘ton” mahallasida istiqomat qiluvchi Mirzayev Husniddin Youtube orqali videomurojaat qilib, uning haq-huquqlari toptalgani, tan jarohati yetkazilganidan shikoyat qilib chiqdi. Koson tuman hokimligi mazkur shikoyatni o‘rganib chiqqanida berilgan ma’lumotlar o‘z tasdig‘ini topmadi. Fuqaro aka-ukalari bilan janjallashib, yer maydonini noqonuniy egallab olish harakatida bo‘lgan”.
Izoh (0)