Ижтимоий тармоқларда Қашқадарё вилоятининг Косон туманида яшовчи фуқаронинг оғир аҳволдалиги айтилган видео тарқалди. Видеода чиқиш қилган Ҳусниддин Мирзаев 14 тонна ғалласи ҳудуд профилактика инспектори томонидан тортиб олингани-ю, қизининг номусига тегишга ҳаракат бўлганидан шикоят қилади.
Воқеа тафсилотларини ўрганган «Дарё» мухбири Отабек Қўлдошевнинг воқеага аниқлик киритишича, фуқаро Ҳусниддин Мирзаев ака-укалари билан келишолмаганлиги сабабли можаро келиб чиққан.
Маълум бўлишича, туманнинг «Бешқўтон» маҳалласида яшовчи Ҳусниддин Мирзаев укалари — Одилбек, Нодирбек ва Баҳриддин Мирзаевлар билан ўзаро келишмай қолган.
Ҳусниддин Мирзаевнинг «Дарё» мухбирига маълумот беришича, у 2016 йил «Мажидов Нормўмин» фермер хўжалигини ташкил этиб, 37 гектар ер майдонини олиб, фаолиятини бошлаган. 2017 йил ғалла экиб, давлат режасини 102 фоизга бажарган. 2018 йил эса 70 фоизга, 2019 йилга келганда эса Вазирлар Маҳкамаси қарорига мувофиқ фермер хўжаликлари оптималлаштирилади ва «Мажидов Нормўмин» фермер хўжалигининг 37 гектар ери «Шерали» фермер хўжалигига қўшиб юборилади.
— Ғаллани экдим, парваришладим, ҳосил йиғадиган пайт эса бошқалар эга чиққани аламли бўлди, — дейди Ҳусниддин Мирзаев. – Ғалладан давлат режаси 30 тонна эди, аммо менинг 44 тонна ғалламни олишди. Зўравонлик билан олиб қўйишди. Бир халта ғалла ҳам беришмади. «Участкавой»га бир халта ғалла беринг, дедим. Аммо бермади.
Маълум бўлишича, Ҳусниддин Мирзаев раислигидаги «Мажидов Нормўмин» фермер хўжалиги 2019 йил «Шерали» фермер хўжалиги таркибига қўшилгач, 2019 йилнинг ҳосили ҳам «Шерали» фермер хўжалиги вакиллари томонидан йиғиб олинади. Бундан норози бўлган Ҳусниддин Мирзаев ғалла учун меҳнат қилганини айтиб, ўзи учун ҳам олиб қолишни сўрайди.
— 44 тонна ғалланинг барчасини топширасиз, бу туман ҳокимининг буйруғи дейишди, — дейди Ҳусниддин Мирзаев. – «Тепа»нинг буйруғи деди. Майли, деб ғаллани топширдик. Аламлиси, шунча меҳнат қилиб, бир халта ғалла ҳам ололмадик.
Аниқланишича, Ҳусниддин Мирзаев 2016 йил фермерликни бошлагандан буён фермер хўжаликда ишчи бўлиб ишловчи укалари билан келишмайди. Ҳар доим уруш-жанжал қилиб келади. Буни Ҳусниддин Мирзаевнинг марҳум онаси Мейлихол Бердиёрованинг 2018 йил 30 июндаги Ўзбекистон Президентига ёзган шикоят аризасидан ҳам билиш мумкин.
Мейлихол Бердиёрова ўз мурожаатномасида ўғли Ҳусниддин Мирзаев укалари билан келишмаётганини, оилага тегишли фермер хўжаликни 2016 йил ўғли Ҳусниддин Мирзаевга бериб хато қилганини ёзади ва ерни қайтариб олишда кўмак сўрайди.
Ҳусниддин Мирзаев эса укалари Нодирбек, Одилбек ва Баҳриддин Мирзаевлар фермер хўжалиги ташкил этилганидан бери у билан муроса қилмаётганидан нолийди.
— Энг ёмони, ўғлимни ётқизиб, бўйнига «лапатка» тирашди. Сўйиб ташлашга уринди, — дейди Ҳусниддин Мирзаев укаларидан шикоят қилар экан. — Бир куни кечаси ташқарида юрсам, қизимнинг бақирган овози эшитилди, онаси билан югуриб бордик. Борсак, қизимни ечинтиришга уриниб, кўйлакларини ечиб ташлаган Нодирбек Мирзаев қизимни камерага оляпти. Зўрламоқчи бўлган. Бу ҳақда ҳудуд профилактика инспекторига шикоят қилдим. Бирор нима қилдими, деб сўрайди. Бирор нарса қилиши шартми? Шундай кўнгилсиз воқеанинг олдини олишимиз керакмасми аслида.
«Дарё» мухбири билан суҳбатлашган Одилбек Мирзаев ҳамда Нодирбек Мирзаевлар акаси уларни жиянларини урганликда ва қизининг номусига тегиши ҳақидаги айбловига жавоб берар экан шундай дейди:
— Акам билан 2016 йилгача бирга яшаганмиз, фарзандлари эса жигаримиз. Айтингчи, инсон ўз жигарини ўлдиришга ҳаракат қилиши ёки қиз жиянининг номусига тегишга уриниши мумкинми? – дейди Одилбек Мирзаев. – Ахир улар бизнинг жигарларимиз, акам ўз манфаати учун ҳар қандай айбловдан тонмаяпти. Бу нафақат биз учун, оиламиз шаъни учун ҳам шармандали ҳолат-ку. Онам ҳам акамнинг шундай қилмишларига чидолмай кўз юмди. Ҳатто онасининг маъракасига келмаган фарзанд жигарларини ҳам аямаслигини исбот қиляпти.
Одилбек Мирзаевнинг маълумот беришича, Ҳусниддин Мирзаев тортиб олишди деётган 14 тонна ғалланинг 9 тоннаси уларга берилган. Қолган 5 тонна ғалла эса «Мажидов Нормўмин» фермер хўжалигининг 2018 йилдаги қарздорлигини ёпиш учун ишлатилган.
— 2019 йил 26 май куни мени уриб, бошимга «лапатка» билан тушириб қулоғимни йиртиб юборишди, кўзимни кўр қилишди, — дейди Ҳусниддин Мирзаев. — Тошкентга бориб, экспертизадан ўтиб келдим. Аммо прокуратура бу жиноятни ёпяпти. Жиноят аломати йўқ деб ёпяпти.
Ҳусниддин Мирзаевнинг укалари эса бу фикрни рад этмоқда.
— Акамнинг «уриб кўзимни кўр қилишди», — деган гапи ҳам уйдирма, — дейди Одилбек Мирзаев. – Кўзларидаги нуқсон ёшлигида орттирилган. Буни уйдагилар — ака-укаларимиз ва опаларим тасдиқлашади.
Ушбу ҳолат ижтимоий тармоқларда тарқалгач, Косон туман ҳокимлиги ахборот хизмати ҳам вазиятни ўрганади ва қуйидагича фикр беради:
«Косон тумани «Бешқўтон» маҳалласида истиқомат қилувчи Мирзаев Ҳусниддин Youtube орқали видеомурожаат қилиб, унинг ҳақ-ҳуқуқлари топталгани, тан жароҳати етказилганидан шикоят қилиб чиқди. Косон туман ҳокимлиги мазкур шикоятни ўрганиб чиққанида берилган маълумотлар ўз тасдиғини топмади. Фуқаро ака-укалари билан жанжаллашиб, ер майдонини ноқонуний эгаллаб олиш ҳаракатида бўлган».
Изоҳ (0)