Qozog‘iston poytaxti hokimi qatnovga qo‘yilgan 15 ta elektrobuslarning holati va texnik tavsifi bilan tanishib chiqdi. Shahar ichida qatnaydigan bu turdagi avtobuslarning sonini 100 taga yetkazish rejalashtirilgan, deb xabar beradi “Informbyuro”.
Elektrobuslar juda qulay va deyarli ovozsiz harakatlanadi — atmosferaga zararli chiqindilar chiqarmaydi, shuningdek, iqtisodiy jihatdan tejamkor. Bu esa avtobus parklariga yoqilg‘ining o‘zidan 80 foiz tejash imkonini beradi.
“Ekpluatatsiya tejamkorligi 80 foizga teng. Dizel uchun bir sutkaga 22—25 ming tenge sarflansa, elektr uchun 4—5 barobar kamroq sarflanadi. Konstruksiyaning o‘zi avtobusni bir kunda bir marotaba quvvatlantirish imkonini beradi — kunduzi quvvatlantirish shart emas”, — deydi “Astana LRT” boshqaruv raisi o‘rinbosari Baurjon Saitov.
Yangi avtobuslar intellektual kuzatuv tizimi, nogironlar va bolalari bo‘lgan yo‘lovchilar uchun maxsus joylar bilan jihozlangan.
Eslatib o‘tamiz, Toshkent hokimi Jahongir Ortiqxo‘jayev va “Belkommunmash” rahbari Vladimir Korol o‘rtasida 2018-yil sentabrida bo‘lib o‘tgan muzokaralar yakuniga ko‘ra, Belarus elektrobuslaridan birini Toshkentda sinab ko‘rish bo‘yicha kelishuvga erishilgan edi. 450 ming dollarga xarid qilingan birinchi elektrobus Toshkentda 2019-yil 13-sentabrdan harakatlanishni boshlagandi. Toshkent shahar hokimligi bunday elektrobuslar soni 10 ta yetkazilishini ma’lum qilgan. Keyinroq butun shahar uchun bitta elektrobus kamligi, bitta transport vositasi uchun quvvat olish stansiyasini ishlatish va xizmat ko‘rsatuvchi xodimlarni yollash moddiy jihatdan o‘zini oqlamasligi aytilgandi.
Izoh (0)