Қозоғистон пойтахти ҳокими қатновга қўйилган 15 та электробусларнинг ҳолати ва техник тавсифи билан танишиб чиқди. Шаҳар ичида қатнайдиган бу турдаги автобусларнинг сонини 100 тага етказиш режалаштирилган, деб хабар беради «Информбюро».
Электробуслар жуда қулай ва деярли овозсиз ҳаракатланади — атмосферага зарарли чиқиндилар чиқармайди, шунингдек, иқтисодий жиҳатдан тежамкор. Бу эса автобус паркларига ёқилғининг ўзидан 80 фоиз тежаш имконини беради.
«Экплуатация тежамкорлиги 80 фоизга тенг. Дизель учун бир суткага 22—25 минг тенге сарфланса, электр учун 4—5 баробар камроқ сарфланади. Конструкциянинг ўзи автобусни бир кунда бир маротаба қувватлантириш имконини беради — кундузи қувватлантириш шарт эмас», — дейди «Астана ЛРТ» бошқарув раиси ўринбосари Бауржон Саитов.
Янги автобуслар интеллектуал кузатув тизими, ногиронлар ва болалари бўлган йўловчилар учун махсус жойлар билан жиҳозланган.
Эслатиб ўтамиз, Тошкент ҳокими Жаҳонгир Ортиқхўжаев ва «Белкоммунмаш» раҳбари Владимир Корол ўртасида 2018 йил сентябрида бўлиб ўтган музокаралар якунига кўра, Беларусь электробусларидан бирини Тошкентда синаб кўриш бўйича келишувга эришилган эди. 450 минг долларга харид қилинган биринчи электробус Тошкентда 2019 йил 13 сентябрдан ҳаракатланишни бошлаганди. Тошкент шаҳар ҳокимлиги бундай электробуслар сони 10 та етказилишини маълум қилган. Кейинроқ бутун шаҳар учун битта электробус камлиги, битта транспорт воситаси учун қувват олиш станциясини ишлатиш ва хизмат кўрсатувчи ходимларни ёллаш моддий жиҳатдан ўзини оқламаслиги айтилганди.
Изоҳ (0)