Qozog‘istondagi Bek Air samolyoti aviahalokati tasvirlangan video paydo bo‘ldi

YouTube’dagi Joella Horn kanalida Fokker 100 yo‘lovchi samolyotining Olmaotada halokatga uchrashi tasvirlangan video paydo bo‘ldi, deb xabar beradi Tengrinews.

Voqea kuzatuv kameralarida qayd qilingan. Rolikda dastlab beton devorni va qor bilan qoplangan yo‘lni, so‘ngra soat 07:23:14 da samolyotning yerga qulagani va qorda sirpanib kelib, beton devorga urilganini ko‘rish mumkin.

Bek Air aviakompaniyasining samolyoti 27-dekabr, juma kuni Qozog‘iston mahalliy vaqti bilan tonggi soat 7 da halokatga uchragan. Layner bortida besh nafar ekipaj a’zosi, 93 nafar yo‘lovchi, jumladan, 89 nafar Qozog‘iston fuqarosi, ikki nafar Ukraina, bir nafar Qirg‘iziston va bir nafar Xitoy fuqarosi bo‘lgan. O‘zbekiston Tashqi ishlar vazirligi halok bo‘lganlar orasida o‘zbekistonliklar yo‘qligini bildirgan. Aviahalokat oqibatida 15 nafar odam, xususan, samolyot komandiri halok bo‘ldi. Rasmiy manbalar aviahalokat qurbonlari sonining 12 nafar ekanini ma’lum qilgan. Olmaotadagi turli tibbiyot muassasalariga jami 49 nafar odam yotqizilgan. Shavkat Mirziyoyev Olmaotadagi aviahalokat munosabati bilan Qozog‘iston prezidentiga ta’ziya bildirgan.