Taniqli iqtisodiy tahlilchi Behzod Hoshimov “Ular” dasturiga bergan intervyusida nima sababdan “Buyuk Kelajak” ekspertlik kengashi safidan chiqqaniga izoh berdi. Uning fikricha, O‘zbekistonga kengashning ichki nizolariga aralashgandan ko‘ra har kim o‘z faoliyati bilan shug‘ullanganidan foyda ko‘proq.
“Buyuk Kelajak” ekspertlik kengashi tarkibidan 10 kishi chiqdik, aslida 50 kishi chiqamiz deb aytayotgandi — ular nega chiqishmaganini bilmayman. Bizning falsafamizga kengash boshqaruvchilarining falsafasi to‘g‘ri kelmadi. Masalan, bir-ikki odam o‘zini yaxshi tutmadi. Biz ko‘p marta ichki instrumentlar orqali buni tuzatishga urindik, o‘xshamadi. Shu bois unga bog‘liq bo‘lish bizga foydadan ko‘ra ko‘proq zarar keltiradi, deb o‘yladik va tashkilot safidan chiqishga qaror qildik.2019-yil sentabrida 10 nafar ekspert “Buyuk Kelajak” ekspertlik kengashini tark etishga qaror qilgani ma’lum bo‘lgandi. Ular orasida Behzod Hoshimov ham bor edi. Kengashni tark etgan ekspertlar guruhi bunga “tashkilot ichidagi ayrim omillar” sabab bo‘lganini aytgan, biroq gap aynan qanday omillar haqida borayotganiga aniqlik kiritmagan edi.Men “Buyuk Kelajak”ning 17 kishilik eng yuqori qo‘mitasining a’zosi edim. Qo‘mitaning asosiy funksiyalaridan biri yangi a’zolarni qabul qilish, umuman, boshqaruvga doir qarorlarni qabul qilish edi. O‘sha yerda ham, masalan, biz qo‘mita sifatida fikr bildirsak, ba’zida fikrlarimizni eshitishmasdi. Bu bir kunda bo‘lmagan, taxminan yarim yil davomida fikrlarimiz inobatga olinishi uchun harakat qilganmiz.
Kengash tarkibidan chiqish bo‘yicha mening shaxsiy fikrim — unga vaqt ketkazgandan ko‘ra o‘z ishim bilan shug‘ullansam, O‘zbekistonga ko‘proq foydam tegadi. Har kuni “Buyuk Kelajak”ning ichki nizolarini kavlashdan ko‘ra, o‘sha bir soatda bir narsa yozib qo‘yaman, kimdir bilan gaplashaman, boshqacharoq foyda keltiraman, deb o‘yladim. Shu sababdan tashkilot safidan chiqdim; bu g‘alvani tozalashga kuch qolmadi, desa ham bo‘ladi.
To‘g‘risini aytsam, “Buyuk Kelajak”ning g‘oyasi menga yoqqan. G‘oya qanday edi? Masalan, chet elda yashagan yoki anchadan beri chet elda yashayotgan o‘zbeklar bor, ularning ba’zilari haqiqatan ham yaxshi mutaxassis. Ularning ekspertizasi, tajribasi, bilimlari O‘zbekistonning hozirgi islohotlari uchun muhim bo‘lishi mumkin. “Buyuk Kelajak” esa mana shunday odamlarni tanishtiradigan tarmoq uchun tashkil etilgan g‘oya edi, deb o‘ylayman.
Kengash a’zolaridan, deylik, Odilbek Isakov keyinchalik moliya vaziri o‘rinbosari bo‘ldi. Kengashga a’zo odamlar O‘zbekiston uchun foydali ish qiladi, degan g‘oya bor edi, lekin kengashdan chiqib ketganlar ham foyda beryapti. Misol uchun, ulardan biri — Umid Obidxo‘jayev. U hozir Prezident administratsiyasi huzuridagi Iqtisodiy tadqiqotlar institutining rahbar o‘rinbosari bo‘lib ishlaydi.
“Buyuk Kelajak” ekspertlik kengashidan chiqib ketdi degani — umuman O‘zbekistondan ketdi, degani emas. Hozir ham mamlakatga qo‘ldan kelganicha foyda keltirishga harakat qilyapmiz.
Behzod Hoshimov, iqtisodiyotchi
Eslatib o‘tamiz, “Buyuk kelajak” XNNT O‘zbekistonda amalga oshirilayotgan islohotlarni qo‘llab-quvvatlash va ularga ko‘maklashish bilan shug‘ullanadi. Tashkilot 2035-yilgacha O‘zbekistonning rivojlanish konsepsiyasini ishlab chiqish maqsadida Prezident Shavkat Mirziyoyev tashabbusi bilan 2018-yilning aprel oyida tashkil etilgan edi.
Izoh (0)