Таниқли иқтисодий таҳлилчи Беҳзод Ҳошимов «Улар» дастурига берган интервьюсида нима сабабдан «Буюк Келажак» экспертлик кенгаши сафидан чиққанига изоҳ берди. Унинг фикрича, Ўзбекистонга кенгашнинг ички низоларига аралашгандан кўра ҳар ким ўз фаолияти билан шуғулланганидан фойда кўпроқ.
«Буюк Келажак» экспертлик кенгаши таркибидан 10 киши чиқдик, аслида 50 киши чиқамиз деб айтаётганди — улар нега чиқишмаганини билмайман. Бизнинг фалсафамизга кенгаш бошқарувчиларининг фалсафаси тўғри келмади. Масалан, бир-икки одам ўзини яхши тутмади. Биз кўп марта ички инструментлар орқали буни тузатишга уриндик, ўхшамади. Шу боис унга боғлиқ бўлиш бизга фойдадан кўра кўпроқ зарар келтиради, деб ўйладик ва ташкилот сафидан чиқишга қарор қилдик.2019 йил сентябрида 10 нафар эксперт «Буюк Келажак» экспертлик кенгашини тарк этишга қарор қилгани маълум бўлганди. Улар орасида Беҳзод Ҳошимов ҳам бор эди. Кенгашни тарк этган экспертлар гуруҳи бунга «ташкилот ичидаги айрим омиллар» сабаб бўлганини айтган, бироқ гап айнан қандай омиллар ҳақида бораётганига аниқлик киритмаган эди.Мен «Буюк Келажак»нинг 17 кишилик энг юқори қўмитасининг аъзоси эдим. Қўмитанинг асосий функцияларидан бири янги аъзоларни қабул қилиш, умуман, бошқарувга доир қарорларни қабул қилиш эди. Ўша ерда ҳам, масалан, биз қўмита сифатида фикр билдирсак, баъзида фикрларимизни эшитишмасди. Бу бир кунда бўлмаган, тахминан ярим йил давомида фикрларимиз инобатга олиниши учун ҳаракат қилганмиз.
Кенгаш таркибидан чиқиш бўйича менинг шахсий фикрим — унга вақт кетказгандан кўра ўз ишим билан шуғуллансам, Ўзбекистонга кўпроқ фойдам тегади. Ҳар куни «Буюк Келажак»нинг ички низоларини кавлашдан кўра, ўша бир соатда бир нарса ёзиб қўяман, кимдир билан гаплашаман, бошқачароқ фойда келтираман, деб ўйладим. Шу сабабдан ташкилот сафидан чиқдим; бу ғалвани тозалашга куч қолмади, деса ҳам бўлади.
Тўғрисини айтсам, «Буюк Келажак»нинг ғояси менга ёққан. Ғоя қандай эди? Масалан, чет элда яшаган ёки анчадан бери чет элда яшаётган ўзбеклар бор, уларнинг баъзилари ҳақиқатан ҳам яхши мутахассис. Уларнинг экспертизаси, тажрибаси, билимлари Ўзбекистоннинг ҳозирги ислоҳотлари учун муҳим бўлиши мумкин. «Буюк Келажак» эса мана шундай одамларни таништирадиган тармоқ учун ташкил этилган ғоя эди, деб ўйлайман.
Кенгаш аъзоларидан, дейлик, Одилбек Исаков кейинчалик молия вазири ўринбосари бўлди. Кенгашга аъзо одамлар Ўзбекистон учун фойдали иш қилади, деган ғоя бор эди, лекин кенгашдан чиқиб кетганлар ҳам фойда беряпти. Мисол учун, улардан бири — Умид Обидхўжаев. У ҳозир Президент администрацияси ҳузуридаги Иқтисодий тадқиқотлар институтининг раҳбар ўринбосари бўлиб ишлайди.
«Буюк Келажак» экспертлик кенгашидан чиқиб кетди дегани — умуман Ўзбекистондан кетди, дегани эмас. Ҳозир ҳам мамлакатга қўлдан келганича фойда келтиришга ҳаракат қиляпмиз.
Беҳзод Ҳошимов, иқтисодиётчи
Эслатиб ўтамиз, «Буюк келажак» ХННТ Ўзбекистонда амалга оширилаётган ислоҳотларни қўллаб-қувватлаш ва уларга кўмаклашиш билан шуғулланади. Ташкилот 2035 йилгача Ўзбекистоннинг ривожланиш концепциясини ишлаб чиқиш мақсадида Президент Шавкат Мирзиёев ташаббуси билан 2018 йилнинг апрель ойида ташкил этилган эди.
Изоҳ (0)