30 декабрь, душанба куни Олий Мажлис Сенатида Одам савдосига ва мажбурий меҳнатга қарши курашиш миллий комиссияси мажлис ўтказди. Мажлисни комиссия раиси — Сенат раҳбари Танзила Норбоева олиб борди. Бу ҳақда «Kun.uz» хабар берди.
Маълум қилинишича, мажлисда сўзга чиққан ички ишлар вазирининг биринчи ўринбосари Азиз Тошпўлатов хорижий давлатларда одам савдоси қурбони бўлган ва қийин аҳволга тушиб қолган фуқароларни Ватанга қайтариб олиб келишдаги муаммолар ҳақида гапирган.
Унинг сўзларига кўра, бунда асосий муаммолар йўл харажатлари ва жабрланганларга вақтинча яшаб туриш учун уй-жой ва озиқ-овқатга сарфланадиган пул маблағларини қоплашга қаратилган жамғарма ёки манба мавжуд эмаслиги ҳисобланади. Ҳаттоки Ўзбекистоннинг чет давлатлардаги консуллик хизматларида ҳам шундай муаммолар юзага келмоқда.
Қайд этилишича, одам савдоси қурбони бўлган ёки қийин аҳволга тушиб қолган фуқароларга нафақат юқорида айтиб ўтилган ёрдамларни, балки тиббий, ижтимоий, юридик ҳамда бошқа ёрдамларнинг кўрсатилишини инобатга олган ҳолда халқаро экспертлар томонидан берилган тавсиялар асосида одам савдоси жабрдийдалари учун фонд ташкил қилиш таклиф қилинган.
Вазир ўринбосари одам савдоси жабрдийдаларига ёрдам бериш бўйича республика реабилитация марказида зарурий ёрдам кўрсатилиши халқаро стандартларга мос келмаслигини ҳам қайд этди.
Унинг сўзларига кўра, ҳозирги кунда 1 нафар жабрланувчи учун тиббий дори-дармонларга ажратиладиган маблағ миқдори (10 кун учун) 49 минг сўмни ташкил қилмоқда ҳамда кунлик овқатланиш учун 11 900 сўм пул ажратилади. Бу масалада ҳам қўшимча маблағ билан таъминлашни кўриб чиқиш мақсадга мувофиқлиги таъкидланди.
Бунга жавобан Сенат раиси Танзила Норбоева барча тузилмалар, жумладан, Хотин-қизлар қўмитаси, Фуқароларнинг ўзини ўзи бошқариш органлари фаолиятини мувофиқлаштириш бўйича Республика кенгаши ва Ёшлар иттифоқида фондлар борлигини айтиб ўтди.
Танзила Норбоева ана шу мавжуд фондлардан самарали фойдаланиш кераклигини таъкидлади. Уларнинг фаолиятида ҳам одам савдоси жабрдийдаларига ёрдам кўрсатиш йўналиши борлиги, барча нодавлат ташкилотларига керагидан ортиқ маблағ берилгани таъкидланди.
Комиссия раиси пуллардан мақсадли ҳамда самарали фойдаланиш учун мутасадди вазирликлар вакилларидан иборат ишчи гуруҳ тузиш ва Молия вазирлигига таклифлар киритиш бўйича топшириқ берди.
Изоҳ (0)