Shimoli-g‘arbiy harbiy okrug qo‘shinlari qo‘mondonligi tashabbusi bilan Urganch shahridagi markaziy Yangi yil archasi oldidagi maydonda vatanparvarlik festivali tashkil etildi. Bu haqda “Daryo”ga okrug matbuot xizmati ma’lum qildi.
Nukus garnizoni Ma’naviyat va ma’rifat markazi harbiy orkestri jamoasi quvnoq qo‘shiqlar, diltortar kuylar bilan barchani o‘ziga jalb etdi.
Yigit-qizlar harbiy akalarining qurol va aslahalar bilan ko‘rsatgan saf elementlari, qo‘l jangi usullarini mahorat bilan bajarganini zavq bilan tomosha qildi. Jangovar, milliy va jahon musiqalari sadolari ostiga raqsga tushishdi.
Urganchliklar uchun shu kuni o‘zgacha bayram bo‘ldi. Yig‘ilganlar harbiy san’atkorlar bilan jo‘r bo‘lib vatanparvarlikka yo‘g‘rilgan qo‘shiqlarni birga kuylashdi.
“Vatanparvarlik – milliy yuksalish kafolati!” shiori ostida o‘tgan festivalda ikki mingga yaqin kishi ishtirok etdi. Tadbir davomida yoshlar harbiylar bilan suhbat qildi. Asosiy mavzu esa “harbiy xizmatchi bo‘lish uchun nimalarga ega bo‘lish kerak?” degan savol bo‘ldi.
Muddatli harbiy xizmatchilar tomonidan “Vatanga qasamyod” matni o‘qib eshittirildi. Uning yangicha mazmuni “Harbiy qasamyod”dan nimasi bilan farq qilishi aytib o‘tildi.
Shuningdek, festival doirasida harbiy xizmatchilar Qurolli Kuchlar tashkil etilganining 28 yilligi va Vatan himoyachilari bayramiga tayyorgarlik ko‘rish va uni o‘tkazish bo‘yicha Prezident farmoni bilan e’lon qilingan “Vatanparvarlik oyligi”da barchani faol ishtirok etishga chorlovchi ko‘rgazmali vositalarni tarqatdi.
Izoh (0)