Joriy yil 24-dekabr kuni Mirobod tumani “Temiryo‘lchilar” mahallasi hududida Toshkent shahar IIBB YHXB, “Avto Plyus Taraqqiyot” kompaniyasi xodimlari hamda Sirg‘ali tumani 12-sonli avtobus saroyi rahbariyati ishtirokida “Temiryo‘lchilar” mahallasida istiqomat qiluvchi fuqarolar bilan sayyor yig‘ilish bo‘lib o‘tgan edi. Bu haqda IIBB matbuot xizmati xabar bermoqda.
O‘tkazilgan yig‘ilishda mutasaddi tashkilot vakillari tomonidan aholi o‘rtasida ularni qiynab kelayotgan muammolar atroflicha o‘rganilganda bir necha yildan beri Mirobod dehqon bozoriga qatnov uchun jamoat transporti yo‘lga qo‘yilmaganligi, bu esa aholiga qiyinchilik tug‘dirayotganligi ma’lum bo‘lgan.
Shundan so‘ng fuqarolarga qulaylik yaratish, ularning uzog‘ini yaqin qilish maqsadida boshqarmasi Toshkent shahar yo‘l harakati xavfsizligi boshqarmasi, Mirobod tumani hokimligi, Toshkent shahar transport boshqarmasi bilan hamkorlikda “Temiryo‘lchilar” mahallasi hududidan 12-sonli avtobus saroyiga tegishli “40-A” yo‘nalishli avtobus yo‘nalishiga o‘zgartirish kiritildi.
“Avto Plyus Taraqqiyot” kompaniyasi tomonidan “164-m” sonli yo‘nalishi bo‘yicha yangi rusumdagi 10 ta yo‘lovchi tashuvchi “Gazel” mikroavtobuslari qatnovi rejalashtirilgan. Hozirgi kunda avtobus “Mirobod dehqon bozori”dan Nukus, Avliyoota ko‘chalari orqali harakatlanmoqda.
Izoh (0)