O‘zbekiston Sog‘liqni saqlash vazirligida navbatdan tashqari videoselektor yig‘ilishi bo‘lib o‘tdi. Vazirlikning Jamoatchilik bilan aloqalar bo‘limidan ma’lum qilishlaricha, unda 25-dekabr kuni Bosh prokuraturada bo‘lib o‘tgan Korrupsiyaga qarshi kurashish bo‘yicha Respublika idoralararo komissiyasining sohada vujudga kelgan korrupsiyaviy holatlar tahliliga bag‘ishlangan yig‘ilishida ko‘tarilgan masalalarga alohida e’tibor qaratilgan.
Mavzuga doir: Prokuratura tekshiruvidan so‘ng Akusherlik va ginekologiya markazining ayrim shifokorlari maoshi 15 mln so‘mgacha oshdi
“Shu bois, korrupsiya va ta’magirlikka qarshi kurashish va unga chek qo‘yish borasida, birinchi navbatda, tizimdagi barcha me’yoriy-huquqiy hujjatlarni qayta ko‘rib chiqib, inventarizatsiyadan o‘tkazish, uni takomillashtirish, o‘z vaqtida ijrosini ta’minlash, vazirlik va uning quyi bo‘g‘inlarida ichki xavfsizlik tarmog‘ini tashkil etish, audit va jamoatchilik nazoratini yo‘lga qo‘yish, yuridik xizmat faoliyatini yanada kuchaytirish, tizimda axborot-kommunikatsiya texnologiyalarini keng tatbiq etish orqali tibbiy xizmat ko‘rsatish shaffofligi va ochiqligini ta’minlash, bunda inson omili aralashuvini keskin kamaytirish kabi qator vazifalar aniq belgilab olindi”, — deya ta’kidlangan rasmiy axborotda.
Videoselektorda korrupsiyaga sharoit yaratib beradigan ko‘plab omillar, jumladan, davolash muassasasi ta’mirlanmagan yoki jihozlanmaganligi uchun pul yig‘ish kabi holatlarga barham berish maqsadida moddiy-texnik bazani mustahkamlash, tibbiyot xodimlarining moddiy manfaatdorligini yanada oshirish tizimini ishlab chiqish kabi muhim jihatlar haqida ham to‘xtalib o‘tilgan. Vazirlik tomonidan yangi, 2020-yil — tizimda korrupsiyaga qarshi kurash yili, deya e’lon qilinib, bu borada aniq chora-tadbirlar belgilab olinishi va ijrosi qat’iy ta’minlanishi ta’kidlangan.
Izoh (0)