“Navoiyazot”da 28-dekabr kuni Polivinilxlorid, kaustik soda va metanol ishlab chiqarish majmuasi ishga tushirildi. Prezident matbuot xizmatining ma’lum qilishicha, shu munosabat bilan o‘tkazilgan marosimda Shavkat Mirziyoyev ishtirok etgan.
Prezident yig‘ilganlarni yaqinlashib kelayotgan Yangi yil bayrami bilan tabriklab, ushbu loyihaning ro‘yobga chiqishiga hissa qo‘shgan quruvchi va kimyogarlarga hamda chet ellik hamkorlarga minnatdorlik bildirgan.
“Bunday muhim, zamonaviy va innovatsion loyihalar Navoiy viloyati iqtisodiyoti va uning ‘lokomotivi‘ bo‘lgan sanoat sohasini yangilash, qo‘shimcha ish o‘rinlari yaratish, aholi va byudjet daromadlarini jadal oshirishga xizmat qiladi”, — deb aytgan Shavkat Mirziyoyev.
Yangi korxonada yiliga 100 ming tonna polivinilxlorid, 75 ming tonna kaustik soda, 300 ming tonna metanol ishlab chiqariladi. Bu mahsulotlarga avtomobilsozlik, to‘qimachilik, metallurgiya, kimyo, neft-gaz tarmoqlari, elektr texnikasi va qurilish materiallari ishlab chiqarishda talab yuqori.
Prezident matbuot xizmatining qayd etishicha, ular shu paytgacha katta valyuta evaziga import qilinardi, ayniqsa kichik biznes subyektlari bu masalada juda qiynalardi. Xitoy kompaniyalar konsorsiumi bilan hamkorlikda qurilgan majmua, shuningdek, har yili 40 million dollarlik mahsulotni eksport qilishi rejalashtirilgan.
Shavkat Mirziyoyev “Navoiyazot”dagi uchta yirik investitsiya loyihasini amalga oshirish oson bo‘lmaganini qayd etdi. “Har qancha qiyin bo‘lsa ham, katta marralarni maqsad qilib qo‘yib, tashabbus ko‘rsatib, fidoyilik bilan mehnat qilsak, albatta ularga erishamiz”, — dedi u.
Shavkat Mirziyoyev Navoiy viloyatining salohiyati bundan-da yuqori ekani, ularni ishga solish uchun zarur sharoit va mutaxassislar borligini qayd etdi.
“Sahro bag‘rida Navoiy va Zarafshon kabi shaharlarni, sanoat mintaqasini barpo etgan viloyatning mehnatkash, mard va olijanob aholisi yangi O‘zbekiston rivojiga katta hissa qo‘shadi”, — dedi Shavkat Mirziyoyev.
“Prezident ramziy tugmani bosib, korxonani ishga tushirdi”, — deya qo‘shimcha qilingan davlat rahbarining matbuot xizmati tarqatgan xabarda. Marosimda mehnat faxriylari, yoshlar, xitoylik muhandislar ham so‘zga chiqqan.
Izoh (0)