«Навоийазот»да 28 декабрь куни Поливинилхлорид, каустик сода ва метанол ишлаб чиқариш мажмуаси ишга туширилди. Президент матбуот хизматининг маълум қилишича, шу муносабат билан ўтказилган маросимда Шавкат Мирзиёев иштирок этган.
Президент йиғилганларни яқинлашиб келаётган Янги йил байрами билан табриклаб, ушбу лойиҳанинг рўёбга чиқишига ҳисса қўшган қурувчи ва кимёгарларга ҳамда чет эллик ҳамкорларга миннатдорлик билдирган.
«Бундай муҳим, замонавий ва инновацион лойиҳалар Навоий вилояти иқтисодиёти ва унинг ‘локомотиви‘ бўлган саноат соҳасини янгилаш, қўшимча иш ўринлари яратиш, аҳоли ва бюджет даромадларини жадал оширишга хизмат қилади», — деб айтган Шавкат Мирзиёев.
Янги корхонада йилига 100 минг тонна поливинилхлорид, 75 минг тонна каустик сода, 300 минг тонна метанол ишлаб чиқарилади. Бу маҳсулотларга автомобилсозлик, тўқимачилик, металлургия, кимё, нефть-газ тармоқлари, электр техникаси ва қурилиш материаллари ишлаб чиқаришда талаб юқори.
Президент матбуот хизматининг қайд этишича, улар шу пайтгача катта валюта эвазига импорт қилинарди, айниқса кичик бизнес субъектлари бу масалада жуда қийналарди. Хитой компаниялар консорсиуми билан ҳамкорликда қурилган мажмуа, шунингдек, ҳар йили 40 миллион долларлик маҳсулотни экспорт қилиши режалаштирилган.
Шавкат Мирзиёев «Навоийазот»даги учта йирик инвестиция лойиҳасини амалга ошириш осон бўлмаганини қайд этди. «Ҳар қанча қийин бўлса ҳам, катта марраларни мақсад қилиб қўйиб, ташаббус кўрсатиб, фидойилик билан меҳнат қилсак, албатта уларга эришамиз», — деди у.
Шавкат Мирзиёев Навоий вилоятининг салоҳияти бундан-да юқори экани, уларни ишга солиш учун зарур шароит ва мутахассислар борлигини қайд этди.
«Саҳро бағрида Навоий ва Зарафшон каби шаҳарларни, саноат минтақасини барпо этган вилоятнинг меҳнаткаш, мард ва олижаноб аҳолиси янги Ўзбекистон ривожига катта ҳисса қўшади», — деди Шавкат Мирзиёев.
«Президент рамзий тугмани босиб, корхонани ишга туширди», — дея қўшимча қилинган давлат раҳбарининг матбуот хизмати тарқатган хабарда. Маросимда меҳнат фахрийлари, ёшлар, хитойлик муҳандислар ҳам сўзга чиққан.
Изоҳ (0)