“Diyor24.uz” nashrida shu masala yuzasidan 17-dekabr kuni “Saylov va monopoliya” sarlavhali material e’lon qilingan. Unda xalq deputatlari Termiz shahar Kengashi deputati saylovini o‘tkazuvchi 16-Turon okrug saylov komissiyasi 260-saylov uchastkasida Saylov kodeksining 25-moddasi talabi buzilganligi haqida so‘z boradi.
Qayd etilishicha, xalq deputatlari Termiz shahar kengashi deputatligiga nomzodi ko‘rsatilgan nomzodlarning birining murojaati yuzasidan jurnalistik tekshiruv o‘tkazilgan. Uning nomzodi 16-Turon saylov okrugi bo‘yicha Termiz shahar Kengashi deputatligiga qo‘yilgan.
Biroq unga raqobatchi nomzodlardan biri rahbarlik qiladigan tashkilot xodimlari saylov uchastka komissiyasini egallab olgan. 260-saylov uchastkasi 8-sonli o‘rta ta’lim maktabi binosida joylashgan bo‘lib, uchastka saylov komissiyasi raisi Z. Rasulov, komissiya raisi o‘rinbosari S.Zoirova, kotibi D.Hasanova, a’zo N.Rahmonova haqiqatdan ham 8-sonli maktab o‘qituvchilari ekanligi aniqlangan.
8-sonli maktab direktori Lapasova Oynabod Abdumurotovnaning nomzodi ham aynan 16-Turon saylov okrugi bo‘yicha Termiz shahar kengashi deputatligiga qo‘yilgan.
Saylov kodeksining “Saylov komissiyasi a’zolariga qo‘yiladigan talablar” nomli 25-moddasi 2-xatboshisida “… Boshqa saylov komissiyalarining a’zolari, siyosiy partiyalarning a’zolari, viloyat, tuman va shahar hokimlari, prokuratura organlarining, sudlarning mansabdor shaxslari, nomzodlarning yaqin qarindoshlari va ishonchli vakillari, shuningdek, nomzodlarga bevosita bo‘ysunuvchi shaxslar saylov komissiyasining a’zosi bo‘lishi mumkin emas”, deb ko‘rsatilgan.
Nashrning yozishicha, ushbu holat yuzasidan shu kungacha mutasaddi tashkilotlar tomonidan hech qanday munosabat bildirilmadi.
Murojaat muallifi esa saylov jarayonida yuqorida ta’kidlangan qonunbuzarlik bartaraf etilmagani, qo‘shimcha ravishda mazkur saylov uchastka komissiyasi tarkibida shu okrugdan xalq deputatlari Termiz shahar kengashi deputatligiga nomzodi ko‘rsatilgan “Turon” mahalla fuqarolar fuqarolar yig‘ini raisiga bevosita bo‘ysunuvchi xodimlar ham faoliyat yuritganini ma’lum qilgan.
“Yuqoridagi holatlar yuzasidan huquqni muhofaza qiluvchi organlar, jumladan, Surxondaryo viloyat prokuraturasi, Surxondaryo viloyat IIBdan rasmiy munosabat kutib qolamiz”, — deyiladi xabarda.
Izoh (0)