Buxoro viloyati G‘ijduvon tumanida 20 yildan ortiq davr mobaynida 4 marta turli joylarga ko‘chirib kelingan, o‘ta achinarli va antisanitar ahvoldagi dehqon bozori 120 milliard so‘m mablag‘ evaziga qayta barpo etilib, foydalanishga topshirildi. Bu haqda “Daryo” muxbiri xabar bermoqda.
G‘ijduvon tuman hokimining qurilish ishlari bo‘yicha o‘rinbosari Axtam Ahmedovga ko‘ra, 4 oy muddatda tiklangan ushbu dehqon bozori 9,2 gektar maydonda joylashgan. Bozorda 500 ga yaqin savdo rastasi, 3000 dan ortiq savdo o‘rni mavjud, har biri 960 o‘rinli 12 ta quyoshdan himoyalangan ochiq ayvon hamda 3 ta yopiq ayvon qurilgan.
Ma’lumotga ko‘ra, G‘ijduvon dehqon bozori Buxoro, Navoiy va Samarqand viloyati aholisiga ham xizmat ko‘rsatadi.
Qayd etilishicha, uzoq yillar sobiq “Paxta tozalash zavodi” binosidan G‘ijduvon dehqon bozori sifatida foydalanib kelingan. Bozor tartibsiz, yong‘in xavfsizligi va sanitariya-gigiyena talablariga javob bermaydigan holatda bo‘lgan. Mazkur bozor faoliyatini allaqachon to‘xtatish kerak bo‘lgan. Biroq, turli sabablarga ko‘ra, muddat biroz uzaygan.
“Bozor tiklanishi jarayonlarida ayrim holatlarda kimgadir ziyon yetkazilgan bo‘lishi mumkin, ammo bugun bu tashvishlar ortda qoldi. G‘ijduvon dehqon bozori endi uzoq yillar xalqqa xizmat ko‘rsatadi. O‘ylaymanki, ushbu bozor 2020-yil boshida g‘ijduvonliklar uchun munosib tuhfa bo‘la oladi”, — dedi Buxoro viloyati hokimi O‘ktam Barnoyev bozor ochilishi marosimida.
Bozorda sut va sut mahsulotlari, tirik baliqni sotishga mo‘ljallangan maxsus binolar, fermer xo‘jaliklarining yetishtirgan mahsulotlarini sotishi uchun pavilyon hamda “G‘ijduvon dehqon bozori”ning ma’muriy binosi mavjud. U yerda 2000 ta yangi ish o‘rnini tashkil etish ko‘zda tutilgan.
Izoh (0)