Камерунлик 5 нафар шахс фирибгарлик йўли билан Ўзбекистонда 340 минг долларни қўлга киритди (видео)

Камерун Республикасининг тўрт нафар фуқароси Ўзбекистонга гўёки инвестор сифатида ташриф буюриб, фирибгарлик йўли билан Ўзбекистон фуқароларидан 340 минг доллар миқдоридаги маблағни ўзлаштирган. Мазкур ҳолат юзасидан дастлабки тергов ҳаракатлари якунланди. Бу ҳақда Ички ишлар вазирлиги ҳузуридаги Тергов департаменти хабар берди.

Маълум қилинишича, бу фуқаролар Камерун давлатидан туриб жиноий мақсадларини амалга ошириш учун Ўзбекистонда яшовчи бир нечта фуқаро билан интернет орқали мулоқотга киришган ҳамда ўзларини инвестор сифатида таништирган. Шу орқали улар ўзаро ҳамкорлик таклиф қилиб, имконияти етарли бўлган ўзбекистонликларни сармоя киритувчилар сифатида танлаб олган. Камерунликлар ўзларини ҳам ана шу соҳа вакили сифатида таништирган.

Ўзбекистонликлар уларнинг бу гапларига ишониб, ўз пулларини ана шу пуллардан олиш эвазига камерунликларга топширган. Шу тариқа, камерунлик шахслар Ўзбекистон фуқароларидан жами 340 минг доллар пулни ўзлаштириб олган.

Мазкур ҳолат юзасидан ИИВ ҳузуридаги Тергов департаменти томонидан жиноят иши қўзғатилиб, дастлабки тергов ҳаракатлари олиб борилди. Маълум бўлишича, камерунлик мазкур фуқаролар фирибгарлик жиноятидан ташқари, кўп миқдордаги қалбаки пулларни ўтказиш билан ҳам шуғулланган.

Шунга кўра, Камерун фуқаролари Ипполит Аристит, Беакуп Патрик ва Синдуя Фабианга нисбатан Жиноят кодексининг 168-моддаси 4-қисми «а» банди (фирибгарлик) ва 176-моддаси 3-қисми «а» банди (қалбаки пул, акциз маркаси ёки қимматли қоғозлар ясаш, уларни ўтказиш), Родриге Вилфредга нисбатан 168-моддаси 3-қисми «а» ва «б» бандлари ва Жон Фонбега нисбатан 168-моддаси 4-қисми «а» банди билан айблов эълон қилиниб, уларнинг барчасига қамоққа олиш тарзидаги эҳтиёт чораси қўлланилган.

Ҳозирда ҳолат бўйича айблов хулосаси тузилиб, Бош прокуратурага юборилган.

Аввалроқ нукуслик фуқаро интернетда алданиб 165 миллион сўм пулини Нигериядаги ҳисоб рақамларга ўтказиб юборгани ҳақида хабар берилган эди.