Бухоро вилояти Ғиждувон туманида 20 йилдан ортиқ давр мобайнида 4 марта турли жойларга кўчириб келинган, ўта ачинарли ва антисанитар аҳволдаги деҳқон бозори 120 миллиард сўм маблағ эвазига қайта барпо этилиб, фойдаланишга топширилди. Бу ҳақда «Дарё» мухбири хабар бермоқда.
Ғиждувон туман ҳокимининг қурилиш ишлари бўйича ўринбосари Ахтам Аҳмедовга кўра, 4 ой муддатда тикланган ушбу деҳқон бозори 9,2 гектар майдонда жойлашган. Бозорда 500 га яқин савдо растаси, 3000 дан ортиқ савдо ўрни мавжуд, ҳар бири 960 ўринли 12 та қуёшдан ҳимояланган очиқ айвон ҳамда 3 та ёпиқ айвон қурилган.
Маълумотга кўра, Ғиждувон деҳқон бозори Бухоро, Навоий ва Самарқанд вилояти аҳолисига ҳам хизмат кўрсатади.
Қайд этилишича, узоқ йиллар собиқ «Пахта тозалаш заводи» биносидан Ғиждувон деҳқон бозори сифатида фойдаланиб келинган. Бозор тартибсиз, ёнғин хавфсизлиги ва санитария-гигиена талабларига жавоб бермайдиган ҳолатда бўлган. Мазкур бозор фаолиятини аллақачон тўхтатиш керак бўлган. Бироқ, турли сабабларга кўра, муддат бироз узайган.
«Бозор тикланиши жараёнларида айрим ҳолатларда кимгадир зиён етказилган бўлиши мумкин, аммо бугун бу ташвишлар ортда қолди. Ғиждувон деҳқон бозори энди узоқ йиллар халққа хизмат кўрсатади. Ўйлайманки, ушбу бозор 2020 йил бошида ғиждувонликлар учун муносиб туҳфа бўла олади», — деди Бухоро вилояти ҳокими Ўктам Барноев бозор очилиши маросимида.
Бозорда сут ва сут маҳсулотлари, тирик балиқни сотишга мўлжалланган махсус бинолар, фермер хўжаликларининг етиштирган маҳсулотларини сотиши учун павильон ҳамда «Ғиждувон деҳқон бозори»нинг маъмурий биноси мавжуд. У ерда 2000 та янги иш ўрнини ташкил этиш кўзда тутилган.
Изоҳ (0)