Dunyoning ko‘plab davlatlarida 25-dekabr kuni Christmas bayrami nishonlandi. Ko‘plab insonlar dam olayotgan bir pallada Angliya Premyer Ligasi futbolchilari bugundan boshlab, kunora o‘yin o‘tkazishga majbur. Har holda Angliyada shunday an’ana bor. Uning nomi — Boxing Day.
Boxing Day — inglizlar aslida 26-dekabr kunini “Sovg‘alar kuni” sifatida nishonlaydi. Bu kuni odamlar bir-biriga sovg‘a ulashadi. Box — o‘zbek tiliga “quti” deya tarjima qilinishidan ko‘pchilikning xabari bo‘lsa kerak. Aslida ushbu bayramning kelib chiqishi ham qutilar bilan bog‘liq. XVIII asrda ingliz zodagonlari Christmas bayramining ertasiga o‘z xizmatkorlariga qutilarda sovg‘alar ulashgan. So‘ngra bu yillar davomida an’anaga aylandi. Buning futbolga nima aloqasi bor dersiz? Gap shundaki, ingliz futbolidagi Boxing Day aslida qutilarda sovg‘a ulashadigan kun emas, bu to‘g‘ri. Ammo 10 kun ichida jamoalarning 3-4 ta o‘yin o‘tkazishi orqali muxlislar olam-olam sovg‘a olishi bor gap. APL 26-dekabr kuni o‘yin o‘tkazadigan dunyodagi yagona liga. Bu orqali barcha jamoalar muxlislarga ramziy ma’noda sovg‘a hozirlagandek bo‘ladi.
Boxing Day’da jamoalarning musobaqa jadvalidagi o‘rni va ayni damdagi holati o‘ta muhim ahamiyat kasb etmaydi: xoh “Aston Villa”, “Sauthempton”, xoh “Vest Hem”, “Brayton” bo‘lsin, barchasining stadioni muxlislar bilan to‘lib toshadi.
Tarixdagi ilk Boxing Day uchrashuvi 1860-yil 26-dekabrida o‘tkazilgan. Unda tashkil etilganida ko‘p bo‘lmagan “Hallam” hamda “Sheffild” klublari o‘zaro bellashadi. Unda “Sheffild” raqibini 2:0 hisobida taslim etgan. Oradan deyarli yuz yil o‘tib, 1957-yildan e’tiboran, 26-dekabrda o‘yin o‘tkazish Angliyaning barcha divizionlarida ana’anaga aylangan.
Qiziqarli faktlar:
- Boxing Day bahslarida so‘nggi o‘rinni egallagan jamoalar oxirgi 20 yilda quyi divizion — Chempionshipga tushib ketgan;
- Ko‘p holatlarda Christmas bayramiga qadar musobaqa jadvalida peshqadam bo‘lgan klublar yakunda APL chempionligini qo‘lga kiritgan;
- Boxing Day’da qayd etilgan eng sermahsul o‘yinlar 1963-yil 26-dekabriga to‘g‘ri keladi. O‘shanda 10 ta o‘yinda 6 ta gol urilgan;
- O‘shanda muxlislar 3 ta poker, 3 ta het-trik, 8 ta dubl va 4 ta qizil kartochka guvohi bo‘lgan;
- 1963-yil Boxing Day’dagi bitta o‘yinga gollarning o‘rtacha to‘g‘ri kelishi 6,6 tani tashkil etgan.
APL19-tur bahslari26-dekabr, payshanba
- “Tottenhem”—“Brayton” 17:30
- “Bornmut”—“Arsenal” 20:00
- “Aston Villa”—“Norvich” 20:00
- “Chelsi”—“Sauthempton” 20:00
- “Kristal Pelas”—“Vest Hem” 20:00
- “Everton”—“Byornli” 20:00
- “Sheffild Yunayted”—“Uotford” 20:00
- “Manchester Yunayted”—“Nyukasl” 22:30
- “Lester”—“Liverpul” 01:00
- “Vulverhempton”—“Manchester Siti” 00:45
Asror Abdunazarov tayyorladi
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)