Xitoy futbol assotsiatsiyasi klub futboliga oid bir qator qarorlar qabul qildi.
2020-yilgi mavsumdan boshlab chet eldan keladigan futbolchining yillik maoshi 3 million yevrodan oshmasligi belgilab qo‘yildi. Mazkur maosh chegarasiga bonus va soliqlar kirmaydi.
Bu qoida Xitoyga chet eldan ko‘plab yulduz futbolchilar kelishini deyarli to‘xtatadi. Ma’lumot uchun “Shanxay SIPG” futbolchilari Xalk va Oskar yiliga mos ravishda 20 hamda 25,5 million yevro miqdorida pul ishlaydi.
Yangi maosh tizimi yanvardan kuchga kiradi. 3 million — faqat legioner futbolchilar uchun amal qiladi. Xitoylik futbolchilar uchun to‘lanadigan yillik maosh esa 10 million yuandan (1,29 mln yevro) oshmaydi. Xitoy terma jamoasi futbolchilari uchun 20 foizlik ustama haqi nazarda tutilgan.
21 yoshgacha bo‘lgan xitoylik futbolchilar esa yiliga ko‘pi bilan 300 ming yuan (38,64 ming yevro) maosh olishi mumkin.
Legionerlar limitiga keladigan bo‘lsak, 2020-yildan Xitoy Superligasi klublari o‘yin qaydnomasiga ko‘pi bilan besh nafar chet ellik futbolchini kirita oladi va ularning faqat to‘rttasi bir vaqtda maydonda harakat qilishi mumkin. Osiyolik futbolchilar uchun alohida o‘rin ajratilmagan, ya’ni osiyolik o‘yinchi ham chet ellik maqomida bo‘ladi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)