Sog‘liqni saqlash vaziri Alisher Shodmonov Senatning taklifnomasida u yoki biror o‘rinbosari aniq ko‘rsatilmagani uchun ham Senat Kengashining 24-dekabr kuni bo‘lib o‘tgan kengaytirilgan yig‘ilishida qatnashmagan. Vazir bu haqda 25-dekabr kuni O‘zbekiston Bosh prokuraturasida bo‘lib o‘tgan Korrupsiyaga qarshi kurashish bo‘yicha Respublika idoralararo komissiyasining yig‘ilishida ma’lum qildi, deya xabar bermoqda “Daryo” muxbiri Mirolim Isajonov.
Mavzuga doir: Tanzila Norboyeva sog‘liqni saqlash vaziri Alisher Shodmonovga qo‘shtirnoq ichida “salom” yo‘lladi
Vazir Shodmonov davlat rahbarining maslahatchisiga javob berarkan, jumladan, shunday dedi: “Kecha OAVlarda turli chiqishlar bo‘ldi. Men ham rasmiy munosabatimni bildiray, yozib olishsin. Men Senatni, Senat raisini juda hurmat qilaman. Barcha majlislarga borganman, lekin bunisida qatnashmadim. Chunki taklif qilinmagandim”.
Shundan keyin senator Zayniddin Nizomxo‘jayev so‘z olib, sog‘liqni saqlash vazirining fikrlariga munosabatni bildirdi: “Vazirlikka 18-dekabr kuni xat chiqarilgan. Kechagi tadbirda Maktabgacha ta’lim, Xalq ta’limi vazirliklari hisoboti tinglandi. Hammasi keldi, faqat bir odam kelmadi”, — dedi Nizomxo‘jayev, sog‘liqni saqlash vazirini nazarda tutib.
“Daryo” muxbiri Musulmonbek Ibrohimovning ma’lum qilishicha, Senat Kengashining 24-dekabr kuni bo‘lib o‘tgan kengaytirilgan yig‘ilishida Zayniddin Nizomxo‘jayev sog‘liqni saqlash vazirining ishtirokini ta’minlashni so‘rab, rasman xat yuborilganini ta’kidlagan.
Respublika idoralararo komissiyasi yig‘ilishdan so‘ng jurnalistlar bilan bo‘lib o‘tgan muloqotda Alisher Shodmonov Senat Kengashi majlisida nima uchun qatnashmagani haqidagi masalaga yana bir bor to‘xtaldi. “Bizga taklifnoma kelgan, lekin unda vazir yoki vazir o‘rinbosari borishi to‘g‘risida masala ko‘tarilmagani uchun qatnasha olmadim. Ammo sog‘liqni saqlash vaziri o‘rinbosari — Sanitariya-epidimologiya agentligi rahbari hamda vazirlik boshqarma boshlig‘i qatnashgan”, — dedi u.
Vazir Shodmonovning ushbu bayonotlari ortidan Senat axborot xizmati 18-dekabr kuni vazirlikka xat chiqarilgani, xat 20-dekabr kuni feldaloqa xizmati orqali yetkazilgan va shu kuni soat 11:45 Sog‘liqni saqlash vazirligining mas’ul xodimi tomonidan qabul qilib olganini ma’lum qildi.
“Sog‘liqni saqlash vazirining mazkur xatti-harakatlari va vazirlikdagi ijro intizomini kuchaytirish choralarini ko‘rish maqsadga muvofiqligi yuzasidan Oliy Majlis Senati tomonidan Vazirlar Mahkamasiga tegishli xat yuborildi”, — deyiladi Senat axborot xizmatining 25-dekabr kuni tarqatilgan xabarida.
Izoh (0)