Соғлиқни сақлаш вазири Алишер Шодмонов Сенатнинг таклифномасида у ёки бирор ўринбосари аниқ кўрсатилмагани учун ҳам Сенат Кенгашининг 24 декабрь куни бўлиб ўтган кенгайтирилган йиғилишида қатнашмаган. Вазир бу ҳақда 25 декабрь куни Ўзбекистон Бош прокуратурасида бўлиб ўтган Коррупцияга қарши курашиш бўйича Республика идоралараро комиссиясининг йиғилишида маълум қилди, дея хабар бермоқда «Дарё» мухбири Миролим Исажонов.
Мавзуга доир: Танзила Норбоева соғлиқни сақлаш вазири Алишер Шодмоновга қўштирноқ ичида «салом» йўллади
Вазир Шодмонов давлат раҳбарининг маслаҳатчисига жавоб бераркан, жумладан, шундай деди: «Кеча ОАВларда турли чиқишлар бўлди. Мен ҳам расмий муносабатимни билдирай, ёзиб олишсин. Мен Сенатни, Сенат раисини жуда ҳурмат қиламан. Барча мажлисларга борганман, лекин бунисида қатнашмадим. Чунки таклиф қилинмагандим».
Шундан кейин сенатор Зайниддин Низомхўжаев сўз олиб, соғлиқни сақлаш вазирининг фикрларига муносабатни билдирди: «Вазирликка 18 декабрь куни хат чиқарилган. Кечаги тадбирда Мактабгача таълим, Халқ таълими вазирликлари ҳисоботи тингланди. Ҳаммаси келди, фақат бир одам келмади», — деди Низомхўжаев, соғлиқни сақлаш вазирини назарда тутиб.
«Дарё» мухбири Мусулмонбек Иброҳимовнинг маълум қилишича, Сенат Кенгашининг 24 декабрь куни бўлиб ўтган кенгайтирилган йиғилишида Зайниддин Низомхўжаев соғлиқни сақлаш вазирининг иштирокини таъминлашни сўраб, расман хат юборилганини таъкидлаган.
Республика идоралараро комиссияси йиғилишдан сўнг журналистлар билан бўлиб ўтган мулоқотда Алишер Шодмонов Сенат Кенгаши мажлисида нима учун қатнашмагани ҳақидаги масалага яна бир бор тўхталди. «Бизга таклифнома келган, лекин унда вазир ёки вазир ўринбосари бориши тўғрисида масала кўтарилмагани учун қатнаша олмадим. Аммо соғлиқни сақлаш вазири ўринбосари — Санитария-эпидимология агентлиги раҳбари ҳамда вазирлик бошқарма бошлиғи қатнашган», — деди у.
Вазир Шодмоновнинг ушбу баёнотлари ортидан Сенат ахборот хизмати 18 декабрь куни вазирликка хат чиқарилгани, хат 20 декабрь куни фелдалоқа хизмати орқали етказилган ва шу куни соат 11:45 Соғлиқни сақлаш вазирлигининг масъул ходими томонидан қабул қилиб олганини маълум қилди.
«Соғлиқни сақлаш вазирининг мазкур хатти-ҳаракатлари ва вазирликдаги ижро интизомини кучайтириш чораларини кўриш мақсадга мувофиқлиги юзасидан Олий Мажлис Сенати томонидан Вазирлар Маҳкамасига тегишли хат юборилди», — дейилади Сенат ахборот хизматининг 25 декабрь куни тарқатилган хабарида.
Изоҳ (0)