Ijtimoiy tarmoqlarda Qashqadaryoda YPX inspektori vafot etgan fuqaroga ma’muriy bayonnoma rasmiylashtirib, jarima belgilangani haqida xabar tarqaldi.
Qashqadaryo IIB mazkur holatga munosabat bildirdi.
Viloyat IIB axborot xizmatining yozishicha, marhumga joriy yilning 20-noyabr kuni ma’muriy bayonnoma tuzilgan.
Jamoatchilik noroziligiga sabab bo‘layotgan kamchilik 3-YPX otryadi 2-safarbarlik guruhi inspektori, safdor Ravshanov Jahongir Mahmarayim o‘g‘li tomonidan yo‘l qo‘yilgan bo‘lib, voqea Koson tumani hududida sodir bo‘lgan.
2019-yil 20-noyabr kuni soat 10:50 da Koson tumani Nasaf ko‘chasi Xalq banki ro‘parasida xizmat o‘tab turgan YPX inspektori Qarshi shahri tomonga harakatlanib ketayotgan Damas rusumli 70 D 107 NA davlat raqam belgili avtomashina haydovchisini to‘xtatib, 2019-yil 5-oktyabr kuni soat 16:27 da Koson tumani “Shabada” mahallasi Nasaf ko‘chasi ro‘parasida 85 km tezlikda harakatlanib kelganligi “Iskra video-2” rusumli tezlikni o‘lchash moslamasi yordamida aniqlanganini aytgan. Va haydovchidan hujjatlarni so‘ragan.
Haydovchi YPX inspektorini chalg‘itib, boshqa hujjat taqdim etgan. Xodim haydovchi taqdim qilgan hujjatga asosan e’tiborsizlik qilib marhumga ma’muriy bayonnoma rasmiylashtirgan.
Viloyat IIBning ma’lumot berishicha, ushbu holat bo‘yicha viloyat IIB YHXB mas’ul xodimlari tomonidan xizmat tekshiruvi o‘tkazilmoqda.
Izoh (0)