O‘zbekistonda bloklangan yana bir qator saytlar ishga tushirildi

O‘zbekistonda bloklangan Buzzfeed, Lurkmore, Wordpress va boshqa bir qator saytlar ishga tushirildi, deb xabar beradi Spot.

Joriy yilning may oyida O‘zbekistonda bir qator saytlar blokdan chiqarilgan edi. Ular orasidan Voice of Amerika, BBC Uzbek, Deutsche Welle, Reporters sans frontiers, Eurasianet, AsiaTerra, “Fergana.ru” va boshqa qator saylar o‘rin olgan.

Shunga qaramay ayrim saytlar hamon bloklanganicha qolmoqda edi. Ular orasida SoundCloud musiqiy onlayn-platformasi, Web Archive internet arxivi, Lurkmore norasmiy internet-ensiklopediyasi va hokazolar bor.

Bloger va dizayner Azamat Shamuzafarov bu borada AOKAga murajaat qilib, dekabr oyining boshlarida javob olgandi. Unda ushbu saytlar nima sababdan bloklanganiga qator sabablar keltirilgan (asosan axborot xavfsizligi).

Shunga qaramay SoundCloud va Web Archive kabi ko‘plab saytlar O‘zbekistonda ochila boshladi, dekabr oyining o‘rtalarida esa Lurkmore, Buzzfeed va boshqa saytlar ham kirish mumkin bo‘lib qoldi.

Avvalroq O‘zbekistonda bo‘lib turgan The Diplomat xalqaro onlayn jurnalining muharriri Keti Puts o‘zining Twitter’dagi sahifasi orqali xorijdagi inson huquqlarini himoya qilish bilan shug‘ullanadigan tashkilotlarning saytlariga kira olmayotganini yozib qoldirgandi. Human Rights Watch tashkilotining sobiq vakili, Markaziy Osiyoda inson huquqlari bo‘yicha advokat va ekspert Stiv Sverdlov O‘zbekistonda keskin huquq himoyachilarining veb-resurslariga kirish cheklanganini ma’lum qilgan.