Qashqadaryodagi saylov sahnalashtirilgani aytilmoqda. Holat prokuratura nazoratiga olindi

Qashqadaryo viloyati saylov komissiyasi Mirishkor tumanida ovoz berish jarayoni yakunlanishi bilan saylov uchastkasida chiroq o‘chgani, shundan keyin saylov komissiyasi a’zolari saylov qutisiga soxta byulletenlarni tashlashga uringani holati yuzasidan munosabat bildirdi.

Ma’lum bo‘lishicha, Facebook ijtimoiy tarmog‘ining “Xalq bilan muloqot” guruhidagi bloger Karimberdi To‘ramurodning “Ko‘rdim, chiroqni yoq!” sarlavhali xabari e’lon qilingan. Unda bloger 22-dekabr kuni Mirishkor tumani Jeynov shaharchasidagi 850-Kattapoy saylov manzilida ro‘y bergan holat videosini joylagan.

Videoda soat 20:00 da chiroq o‘chishi bilan saylov komissiyasi xodimlari Qashqadaryo viloyati kengashi deputatligiga nomzod bo‘lgan Abduvohid Turdialiyevich Begaliyev foydasiga to‘ldirilgan byulletenlar bog‘lami saylov qutisiga tashlab yuborilgani haqida aytilgan.

Qashqadaryo viloyati saylov komissiyasi ushbu holat o‘rganib chiqilganini bildirdi. Unda qayd etilishicha, Saylov kodeksining 96-moddasida saylov davomida yo‘l qo‘yilgan, ovoz berish yakunlariga ta’sir qilgan qoidabuzarliklar sababli saylov umuman yoki ayrim saylov okruglari bo‘yicha yoxud ayrim saylov uchastkalari bo‘yicha haqiqiy emas deb topilishi mumkinligi belgilangan.

Jinoyat kodeksining 146-moddasida saylov komissiyalari a’zolari tomonidan saylov hujjatlarini qalbakilashtirish, saylov yoki imzo varaqalariga soxta yozuvlar kiritish, berilgan ovozlarni ataylab noto‘g‘ri hisoblash uchun jinoiy javobgarlik belgilangan.

Jinoyat kodeksining 10-moddasida qilmishida jinoyat tarkibining mavjudligi aniqlangan har bir shaxs javobgarlikka tortilishi shart deb ta’kidlab o‘tilgan.

Xabar va unga ilova qilingan videotasvirdagi ma’lumotlar huquqiy baho berilishi uchun Mirishkor tuman prokuraturasiga taqdim etilgan.