Ўзбекистон ташқи ишлар вазирининг биринчи ўринбосари Илҳом Неъматовнинг таъкидлашича, дунёнинг турли нуқталарида истиқомат қилаётган Ўзбекистон фуқаролари учун ҳам сайлов участкалари ташкил этилди. Ушбу ҳолат мамлакат тарихида илк бор кузатилмоқда.
У бу ҳақда 22 декабрь куни Марказий сайлов комиссиясининг Халқаро матбуот марказида бўлиб ўтган брифингда маълум қилди, дея хабар берди «Дарё» мухбири Мусулмонбек Иброҳимов.
«Бугунги сайлов мутлақо янги сиёсий муҳитда ўтмоқда. Давлатимиз раҳбари томонидан нафақат Ўзбекистонда, балки кўплаб давлатларда ҳам яшаётган фуқароларимизнинг сайловдаги иштирокини таъминлашга жуда катта эътибор қаратилди. 55 та мамлакатда очилган сайлов участкаларининг ҳаммасини Марказий сайлов комиссияси ҳамкорлигида керакли барча нарсаларни ўз вақтида етказиб, камчиликларсиз таъминладик.ТИВ расмийсининг айтишича, 12—18 декабрь кунлари ўтказилган муддатидан олдин овоз бериш доирасида 90 мингдан ортиқ хориждаги фуқаролар сайлов жараёнида бевосита қатнашган.Янги қабул қилинган сайлов кодекси асосида, Ўзбекистон тарихида биринчи марта турли сабабларга кўра хорижда яшаётган ватандошларимиз учун электрон шаклда сайлов участкасининг сайловчилар рўйхатига кириш тизими йўлга қўйилди. Шу пайтга қадар бу тарзда чет элдаги ўзбекистонликларга ҳеч қачон сайлов ўтказилмаган», — деди Илҳом Неъматов.
«Тошкент вақти билан соат 8:00 дан 11:00 гача бўлган вақт оралиғида 11 та давлатда 15 та сайлов участкалари очилиб, овоз бериш жараёнлари бошланди.Эслатиб ўтамиз, Ўзбекистон парламенти сайловлари учун рўйхатга олинган 20,5 миллион нафар сайловчининг 8,3 фоизи хориждаги сайлов участкалари ҳисобига тўғри келади. 1,7 миллион нафарга яқин ўзбекистонлик 38 та чет давлатдаги 55 та сайлов участкасида овоз бериши мумкин.Соат 12:00 да яна 25 та давлатда 37 та сайлов участкаси очилган бўлса, бир соат ўтиб Лондондаги элчихонада сайлов участкаси иш бошлади. Энг сўнгги сайлов участкалари Тошкент вақти билан соат 18:00 да Вашингтон ва Нью-Йоркда очилади.
Парламент сайловлари Владивостокда бошланган бўлса, Америкада тамом бўлади. Маҳаллий вақт билан соат 12:00 га чет элдаги 1455 нафар фуқароларимиз овоз берди», — деди Неъматов.
Изоҳ (0)