O‘zLiDeP vakili: “Metro qurilishidagi fojia uchun mutasaddilar xalqdan uzr so‘rasin”

Yunusoboddagi metro qurilishi vaqtida yuz bergan fojia yuzasidan mutasaddilar xalqdan uzr so‘rashi kerak. Ushbu fikr Xalqaro press-klubning “Saylov kampaniyasining 80 kuni: Qanday va’dalar berildi va imkoniyatlardan qanday foydalanildi?” mavzusida o‘tkazilgan anjumanida O‘zbekiston Liberal-demokratik partiyasi vakili Nuriddin Murodov tomonidan bildirildi.

18-dekabr kuni Toshkent metropoliteni “Yunusobod” yo‘lining qurilishi davom etayotgan qismida tuproq ko‘chishi hodisasi yuz berdi. So‘nggi ma’lumotlarga ko‘ra, hodisa oqibatida olti kishi halok bo‘lgan. Fojia sabablarini o‘rganish va oqibatlarini bartaraf etish bo‘yicha hukumat komissiyasi tuzilgan, jinoyat ishi qo‘zg‘atilgan. Qurbonlarning oilalariga 100 million so‘mdan kompensatsiya puli berilgan.

“Yunusobod” metro yo‘lining yangi — “Yunusobod” va “Turkiston” bekatlari dastlabki reja bo‘yicha 2019-yil oxirigacha foydalanishga topshirilishi kerak edi. Tasdiqlanmagan ma’lumotlarga ko‘ra, 28-dekabrdan yangi metro yo‘li bo‘ylab qatnovlar amalga oshirilishi kerak bo‘lgan.

Metroda sodir bo‘lgan voqeani nazorat qilish uchun tashkil etilgan komissiya tarkibida deputatlar ham bo‘lishi kerak. Voqea-hodisani o‘rganish o‘z yo‘liga — undan avval holat yuzasidan mutasaddilar xalqdan uzr so‘rasin.

Ikki-uch yil oldin qurilish sohasi mutlaqo yopiq edi. U yerda nima bo‘lyapti, nima o‘zgaryapti — bilmaganmiz. Hali hanuz “Qishloq qurilish invest”,“O‘zshahar qurilish invest” kabi muassasalar mutlaqo korrupsiyalashgan.

Xalqimiz yirik qurilish obyektlari bayramlarga to‘g‘rilab qurib bitkazilishidan mutlaqo norozi. Bizning partiya ham bu amaliyotga qarshi.

Nuriddin Murodov, O‘zLiDeP vakili