Toshkentdagi “Yunusobod” metro yo‘lining davomini qurish bilan shug‘ullanayotgan “O‘zbekiston temir yo‘llari” kompaniyasi raisi Husnitdin Hosilov barcha xodimlar va shaxsan o‘z nomidan 18-dekabr kuni yuz bergan tuproq ko‘chishi oqibatida halok bo‘lgan ishchilarning qarindoshlariga hamdardlik bildirdi. So‘nggi ma’lumotlarga ko‘ra, olti kishining jasadi tuproq ostidan olib chiqilgan.
“O‘rnini to‘ldirib bo‘lmas yo‘qotish sabab qalbim qayg‘u va dardga to‘la. Bu yigitlar o‘z yaqinlari uchun ko‘plab yaxshiliklar qilgan haqiqiy qahramonlar sifatida abadiy xotiramizda qoladi”, — deya raisning so‘zlaridan iqtibos keltirmoqda kompaniya matbuot xizmati.
“Inson hayoti bebaho va o‘z yaqinini yo‘qotgan oilalar uchun hech narsa marhumlarning o‘rnini to‘liq to‘ldira olmaydi. Biz fojiali halok bo‘lgan yigitlar oilalarining munosib turmushi uchun qo‘limizdan kelgan barcha choralarni ishga solishga o‘z nomimdan va’da beraman”, — deya qo‘shimcha qilgan Husnitdin Hosilov.
Qayd etilishicha, 19-dekabr kuni “Yunusobod” metro yo‘lining yangi qurilayotgan qismida sodir bo‘lgan tuproq ko‘chishi sabablari va oqibatlarini o‘rganish bo‘yicha hukumat komissiyasi o‘z yaqinini yo‘qotgan har bir oilaga 100 million so‘mdan ajratish haqida topshiriq bergan va bu pullar marhumlarning oila a’zolariga topshirilgan.
“Janoza va dafn marosimlarini tashkil etishda har tomonlama ko‘mak ko‘rsatish bo‘yicha ham topshiriq berildi”, — deyiladi “O‘zbekiston temir yo‘llari” axborotida. Ma’lumot uchun, ushbu fojiali hodisa munosabati bilan Bosh prokuratura tomonidan jinoyat ishi qo‘zg‘atilgan.
Izoh (0)