Forbes jurnali YouTube’da eng ko‘p daromad ko‘rayotgan yulduzlar reytingini e’lon qildi. Eng boy YouTube-blogerlar ro‘yxatida birinchi o‘rin 8 yoshli Rayan Kajiga nasib qildi.
Uning kanali bola uch yosh bo‘lgan vaqtida ochilgan, dastlab u kameraga o‘yinchoqlarini namoyish qilgan videolari bilan obunachilar yig‘a boshlagan. Bolakayning yillik daromadi 26 million AQSh dollariga baholangan. Rayan hozir bolalar kiyimlari, o‘yinchoqlari va yana ko‘plab buyumlar savdosi bilan shug‘ullanuvchi o‘z tarmog‘iga ega. Bola Hulu bilan shartnoma tuzgan hamda Nickelodeon’da o‘z teleshousini yuritadi.
Shuningdek, reytingga Minecraft yoki Fortnite videoo‘yinlari ishqibozlari uchun kanal yuritayotgan besh nafar bloger ham kirgan.
Ro‘yxatda 3-o‘rin Rossiyaning Krasnodarsk o‘lkasida tug‘ilgan va AQShda yashayotgan 5 yoshli Anastasiya Razinskayaga berilgan. Qizaloqning yillik daromadi yiliga 18 million dollar.
Forbes nashri Razinskaya otasi bilan birga yuritadigan kanallar YouTube’da juda tez rivojlanayotganini qayd etgan. Qizchaning obunachilari 107 millionga yetgan va uning kanallaridagi umumiy ko‘rishlar soni 42 milliard.
Mavzuga doir: Rossiyalik besh yoshli qizcha YouTube’dagi kanalida oyiga 500 ming AQSh dollari ishlab topmoqda
YouTube’da sifatli kontent topish mumkin, lekin uning daromadga kirishi ancha qiyin kechadi deb yozgan Forbes. Jurnalda ta’kidlanishicha, 10 nafar eng ko‘p daromad ko‘rgan yulduzlar 2018-yil 1-iyunidan 2019-yil 1-iyuniga qadar jami 162 million dollar ishlab topgan.
Izoh (0)