Migrantlar jamiyatning ajralmas qismi, ular o‘z yurtlari va hozirda yashayotgan davlatlarining barqaror rivoji uchun xizmat qiladi. Bu haqda BMT bosh kotibi Antoniu Guterrish 18-dekabr, chorshanba kuni nishonlangan Xalqaro migrant kuni munosabati bilan yo‘llagan bayonotida ma’lum qildi, deya xabar beradi “Gazeta.uz”.
Joriy yil o‘rtalaridagi hisob-kitoblarga ko‘ra, jahonda vatanini tark etgan va xorijga yo‘l olgan 270 million atrofida migrant mavjud. Ular dunyo aholisining 3,5 foizini tashkil etadi.
Bosh kotibning ta’kidlashicha, qochoqlardan farqli o‘laroq migrantlar boshqa mamlakatlarga hayotidan xavfsiragani uchun emas, balki pul topish yoki ta’lim uchun yo‘l oladi. Ular tomonidan uylariga yuborilayotgan pul o‘tkazmalari hajmi rivojlanayotgan davlatlarga ko‘rsatilayotgan rasmiy yordam miqdoridan uch baravar ko‘p. O‘tgan yili bu summa 689 milliard dollarni tashkil etgan.
“Xavfsiz, tartibga solingan va qonuniy migratsiya umummanfaat uchun xizmat qiladi. Migratsiya masalalaridagi milliy ustuvorliklar esa xalqaro hamkorlik asosida samaraliroq amalga oshiriladi”, — deyiladi Guterrishning bayonotida.
Izoh (0)