Ijtimoiy tarmoqlar, xususan, Telegram kanallarida Buxoro viloyatining Peshko‘ tumanidagi maktabgacha ta’lim tashkiloti rahbarlarining shikoyati e’lon qilindi. Unda yozilishicha, bog‘cha mudiralarini obuna qilishga majburlash holati kuzatilgan.
Tabiiyki, ushbu xabarni nafaqat Peshko‘ tuman hokimligi, Buxoro viloyat maktabgacha ta’lim boshqarmasi ham rad etgan. Ularning aytishicha, Peshko‘da majburiy obunadan jabr ko‘rgan mudiralar topilmagan.
— To‘g‘ri, biz “Obuna-2020” kompaniyasi munosabati bilan jamiyat faoliyatiga daxldorligimizni anglagan holda ixtiyoriy ravishda hissa qo‘shishni istaganmiz, — deydi viloyat maktabgacha ta’lim boshqarmasi mutaxassisi Dilovar Boltayeva. — Ammo hech kim obuna bo‘lishga majburlanmagan. Obunadan jabr ko‘rgan mudiralar yo‘q.
Ma’lum bo‘lishicha, 2019-yil 20-noyabr kuni viloyat hokimligida yig‘ilish bo‘lib o‘tgan. “Respublika, viloyat, shahar va tumanlarning davriy nashrlari uchun 2020-yilgi obunani tashkil etish masalalari to‘g‘risida”gi yig‘ilish bayoniga ko‘ra hokimlik tomonidan tavsiyaviy mazmundagi xat chiqarilib, obuna kampaniyasi boshlab yuborilgan.
Viloyat hokimi tomonidan belgilab berilgan tavsiyaviy xatda nima deyilgani, qaysi nashrlar tavsiya qilingani bizga qorong‘i. Ammo bizni maktabgacha ta’lim boshqarmasi mutasaddilari bog‘chalarga tavsiya qilayotgan nashrlarning maktabgacha ta’limga umuman aloqasi yo‘qligi taajjublantirdi.
— Viloyat hokimligi tomonidan berilgan tavsiyaviy xarakterdagi xatga asosan joriy yil 26-noyabr kuni rasmiy xat chiqardik, — deydi viloyat maktabgacha ta’lim boshqarmasi mas’uli. — Unga ko‘ra respublika, viloyat, shahar va tumanlarning davriy nashrlari uchun 2020-yilgi obunani maktabgacha ta’lim tashkilotlarining budjet va budjetdan tashqari mablag‘lari hisobidan belgilangan tartibda tashkil etish tavsiya etildi.
Aniqlanishicha, boshqarma bog‘chalarga 17 nomdagi nashrni tavsiya qilgan.
Ism-sharifining ochiqlanishini istamagan tumandagi maktabgacha ta’lim tashkiloti xodimlaridan birining aytishicha, haqiqatan ham “Xalq so‘zi”, “Pravda vostoka”, “Narodnoye slovo”, “Buxoronoma” kabi gazetalarining obunasini tashkil etish bo‘yicha rasmiy xatlar yetkazilgan.
— Biroq biz rasmiy xatda ko‘rsatilgan nashrlarga emas, balki bolalarbop nashrlarga obuna bo‘ldik. Rahbariyat tomonidan xatda ilova qilingan gazetalarga obuna bo‘lish shartdir. Ammo o‘zimiz uchun kerakli nashrlarga obuna bo‘ldik. Hech qanday e’tiroz bo‘lmadi, — dedi u.
— Tumanimizda jami 40 ta maktabgacha ta’lim tashkiloti mavjud. Hammasi ham har yili sohaga tegishli davriy nashrlarga obuna bo‘lishadi, — deydi Peshko‘ tuman maktabgacha ta’lim bo‘limi mudiri Muhabbat Abdullayeva. — Gazetani, kitobni sevishgani uchun ham obuna bo‘lishadi. Buni to‘g‘ri qabul qilish kerak. Birgina “Maktabgacha ta’lim metodikasi” jurnalini olaylik. Rasmiy xat u yoqda tursin, unga obuna bo‘lish uchun na tavsiya beramiz, na taklif. Bilimlarni oshirish uchun o‘zlari obuna bo‘lishadi.
“Daryo” muxbirining aniqlik kiritishicha, Peshko‘ tumanidagi mavjud bog‘cha mudiralari viloyat maktabgacha ta’lim boshqarmasi boshlig‘i nomiga davriy nashrlarga ixtiyoriy ravishda obuna bo‘lishayotgani to‘g‘risida tushuntirish xati yozgan.
Qiziq, boshqarma boshlig‘i ijtimoiy tarmoqlardagi xabarlarga raddiya berib, obuna ixtiyoriy deyapti-yu ammo qaysi nashrga nechta obuna bo‘lish lozimligini belgilab beryapti. Qani bu yerda ixtiyoriylik. Reja belgilash, boz ustiga nechta obuna bo‘lishini ko‘rsatib qo‘yish — ixtiyoriylik belgisimi?
Qolaversa, bog‘cha mudiralaridan obunani ixtiyoriy qilayotgani haqida tushuntirish xati olinishi judayam qiziq...
Izoh (0)