Ижтимоий тармоқлар, хусусан, Telegram каналларида Бухоро вилоятининг Пешкў туманидаги мактабгача таълим ташкилоти раҳбарларининг шикояти эълон қилинди. Унда ёзилишича, боғча мудираларини обуна қилишга мажбурлаш ҳолати кузатилган.
Табиийки, ушбу хабарни нафақат Пешкў туман ҳокимлиги, Бухоро вилоят мактабгача таълим бошқармаси ҳам рад этган. Уларнинг айтишича, Пешкўда мажбурий обунадан жабр кўрган мудиралар топилмаган.
— Тўғри, биз «Обуна-2020» компанияси муносабати билан жамият фаолиятига дахлдорлигимизни англаган ҳолда ихтиёрий равишда ҳисса қўшишни истаганмиз, — дейди вилоят мактабгача таълим бошқармаси мутахассиси Диловар Болтаева. — Аммо ҳеч ким обуна бўлишга мажбурланмаган. Обунадан жабр кўрган мудиралар йўқ.
Маълум бўлишича, 2019 йил 20 ноябрь куни вилоят ҳокимлигида йиғилиш бўлиб ўтган. «Республика, вилоят, шаҳар ва туманларнинг даврий нашрлари учун 2020 йилги обунани ташкил этиш масалалари тўғрисида»ги йиғилиш баёнига кўра ҳокимлик томонидан тавсиявий мазмундаги хат чиқарилиб, обуна кампанияси бошлаб юборилган.
Вилоят ҳокими томонидан белгилаб берилган тавсиявий хатда нима дейилгани, қайси нашрлар тавсия қилингани бизга қоронғи. Аммо бизни мактабгача таълим бошқармаси мутасаддилари боғчаларга тавсия қилаётган нашрларнинг мактабгача таълимга умуман алоқаси йўқлиги таажжублантирди.
— Вилоят ҳокимлиги томонидан берилган тавсиявий характердаги хатга асосан жорий йил 26 ноябрь куни расмий хат чиқардик, — дейди вилоят мактабгача таълим бошқармаси масъули. — Унга кўра республика, вилоят, шаҳар ва туманларнинг даврий нашрлари учун 2020 йилги обунани мактабгача таълим ташкилотларининг бюджет ва бюджетдан ташқари маблағлари ҳисобидан белгиланган тартибда ташкил этиш тавсия этилди.
Аниқланишича, бошқарма боғчаларга 17 номдаги нашрни тавсия қилган.
Исм-шарифининг очиқланишини истамаган тумандаги мактабгача таълим ташкилоти ходимларидан бирининг айтишича, ҳақиқатан ҳам «Халқ сўзи», «Правда востока», «Народное слово», «Бухоронома» каби газеталарининг обунасини ташкил этиш бўйича расмий хатлар етказилган.
— Бироқ биз расмий хатда кўрсатилган нашрларга эмас, балки болаларбоп нашрларга обуна бўлдик. Раҳбарият томонидан хатда илова қилинган газеталарга обуна бўлиш шартдир. Аммо ўзимиз учун керакли нашрларга обуна бўлдик. Ҳеч қандай эътироз бўлмади, — деди у.
— Туманимизда жами 40 та мактабгача таълим ташкилоти мавжуд. Ҳаммаси ҳам ҳар йили соҳага тегишли даврий нашрларга обуна бўлишади, — дейди Пешкў туман мактабгача таълим бўлими мудири Муҳаббат Абдуллаева. — Газетани, китобни севишгани учун ҳам обуна бўлишади. Буни тўғри қабул қилиш керак. Биргина «Мактабгача таълим методикаси» журналини олайлик. Расмий хат у ёқда турсин, унга обуна бўлиш учун на тавсия берамиз, на таклиф. Билимларни ошириш учун ўзлари обуна бўлишади.
«Дарё» мухбирининг аниқлик киритишича, Пешкў туманидаги мавжуд боғча мудиралари вилоят мактабгача таълим бошқармаси бошлиғи номига даврий нашрларга ихтиёрий равишда обуна бўлишаётгани тўғрисида тушунтириш хати ёзган.
Қизиқ, бошқарма бошлиғи ижтимоий тармоқлардаги хабарларга раддия бериб, обуна ихтиёрий деяпти-ю аммо қайси нашрга нечта обуна бўлиш лозимлигини белгилаб беряпти. Қани бу ерда ихтиёрийлик. Режа белгилаш, боз устига нечта обуна бўлишини кўрсатиб қўйиш — ихтиёрийлик белгисими?
Қолаверса, боғча мудираларидан обунани ихтиёрий қилаётгани ҳақида тушунтириш хати олиниши жудаям қизиқ...
Изоҳ (0)