Xorijlik sayyohlarni ro‘yxatga olishni bekor qilish, duty free, o‘zini ish bilan ta’minlovchi gidlar — Turizm bozorini qanday o‘zgarishlar kutmoqda?

Turizmni rivojlantirish davlat qo‘mitasi mamlakatda turizmni yanada rivojlantirishga qaratilgan Prezident qarori loyihasini muhokamaga qo‘ydi.

Qaror loyihasiga ko‘ra, 2020-yil 1-yanvardan boshlab:

• sayyohlik kompaniyalari 8 va undan ortiq kishini, shu jumladan, haydovchini tashish uchun mo‘ljallangan yangi avtoulovlarni olib kirganda to‘langan QQS miqdori davlat budjetidan qoplanadi;
• gidlar, ekskursiyachilar va yo‘riqchi-instruktorlarning xizmatlari o‘zini o‘zi ish bilan band qiluvchi fuqarolar faoliyati turiga tenglashtirilib, vaqtincha mehnat guvohnomalari beriladi.

Agar qaror shu turda qabul qilinsa, Uzbekistan Airports kompaniyasi quyidagi chora-tadbirlarni taklif etmoqda:

• davlat-xususiy sheriklik shartlari asosida ajratilgan yer uchastkalarida 2020-yil oxiriga qadar zamonaviy avtoturargohlar, kafelar, restoranlar, mini-banklar, mehmonxonalar, oziq-ovqat yuk mashinalari va boshqa tegishli infratuzilmani yaratish;
• 2020-yil 1-iyulgacha mamlakatning barcha xalqaro aeroportlarida davlat-xususiy sheriklik asosida boj olinmaydigan savdo do‘konlari (duty free) ochilishi.

Bundan tashqari, 2023-yil 1-yanvargacha aviatsiya yoqilg‘isi va yoqilg‘i-moylash materiallari, shuningdek, aviatsion yoqilg‘i va yoqilg‘i moylarini tayyorlash uchun xomashyolarni import qilishda kompaniyalarni bojxona to‘lovlaridan ozod qilish rejalashtirilgan.