1 декабрь куни Тошкент вилояти Қибрай туманида бир оиланинг 16 нафар аъзоси ис газидан заҳарланиб шифохонага ётқизилгани, жабрланганларнинг 11 нафари болалар эканлиги ҳақида хабар берилган эди. «Ҳудудгазтаъминот» АЖ мазкур ҳолат юзасидан ўрганиш ўтказди.
Қайд этилишича, «Ҳудудгазтаъминот» АЖ ва «Ҳудудгаз Тошкент» МЧЖнинг «Қибрайтумангаз» филиали ходимлари Қибрай тумани «Алишеробод» маҳалла фуқаролар йиғини «Янги тонг» кўчасида жойлашган хонадонга вазиятни ўрганиш учун зудлик билан етиб борган.
Мутахассислар томонидан хонадондаги барча газ жиҳозлари ва қувурлари қатъий назоратдан ўтказилганда, хонадонда газ сизиб чиқиши ва ис газидан заҳарланиш ҳолатларига олиб келувчи сабаблар мавжуд эмаслиги аниқланди. Фақат, хонадонга ўрнатилган иситиш мосламасининг жойлашуви тасдиқланган техник режага зид равишда, ўзбошимчалик билан ўзгартириб олингани аниқланиб, дарҳол газ таъминотидан узилди. Хонадон эгаси ўзи истиқомат қилувчи ҳудудда газ таъминотида узилишлар бўлмаганлиги ва газ таъминоти корхонасига ҳеч қандай эътирози йўқлигини маълум қилди, дейилади хабарда.
Суриштирувлар натижасида, воқеа аслида бир кун аввал меҳмондорчилик учун хонадонга келган қариндошларнинг қўлбола консерва маҳсулотларини истеъмол қилиши натижасида 7 фуқаро жумладан, икки аёл ва 5 нафар бола озиқ-овқатдан заҳарланиб шифохонага ётқизилгани аниқланди.
« ‘Ҳудудгазтаъминот’ АЖ оммавий ахборот воситалар ва интернет нашрлардан бундай бахтсиз ҳолатлар, айниқса инсон ҳаёти ҳамда саломатлиги билан боғлиқ кўнгилсиз хабарларни тарқатишда ҳолатни ўрганиб, расмий ва аниқ маълумотлар асосида эълон қилишларини, газ истеъмолчиларидан эса хонадон ва бошқа бинолардаги газ анжомларида газ сизиб чиқиш ҳолатлари бор ёки йўқлигига мунтазам эътиборли бўлишларини ҳамда улардан фойдаланишда хавфсизлик техникаси қоидаларига риоя қилишларини сўраймиз», — дейилади хабарда.
Маълумот учун, 1 декабрь куни Қибрайда бир оиланинг 16 нафар аъзоси ис газидан заҳарлангани ҳақидаги хабар Ўзбекистон Ички ишлар вазирлиги ҳузуридаги тергов департаменти сайтида эълон қилинган эди.
Изоҳ (0)