Toshkentdagi 1-son shahar perinatal markazida 25-noyabr kuni uch egizak dunyoga keldi. Chaqaloqlarga Shavkat, Miromon va Mirziyo deb ism qo‘yilgan. Oila boshlig‘i Bekzod Boqiyevning “Daryo”ga ma’lum qilishicha, bolalarning ham, onaning ham ahvoli qoniqarli ekani aytilmoqda.
“Asli Surxondaryodanmiz, Chilonzorda ijara uyda, vaqtincha ro‘yxatdan o‘tib yashaymiz. Ayolim bolalar bog‘chasida ishlaydi, o‘zim xususiy korxona xodimiman. Ikkita o‘g‘limiz bor edi, endi beshta bo‘ldi. Bundan juda ham xursandmiz”, — dedi Bekzod Boqiyev.
Uning aytishicha, chaqaloqlarga “Prezident sovg‘asi” sifatida biror avtomobil sovg‘a qilinishidan umidvor bo‘lib Prezident Shavkat Mirziyoyev sharafiga ism qo‘yilmagan.
“Hech narsadan umidvor bo‘lganimiz yo‘q. Xalqni, yurtni o‘ylaydigan, elga nafi tegadigan insonlar bo‘lsin deb bobolari shunday ism qo‘ydi. c
Eslatib o‘tamiz, 2019-yilda Jizzax, Xorazm, Buxoro, Qashqadaryo viloyatlarida tug‘ilgan uch egizaklarga Shavkat, Miromon va Mirziyo ismlari Farg‘onada tug‘ilgan uch egizakka esa Shavkatjon, Ziroatxon va Saidaxon ismlari qo‘yilgan edi. Buxoroda tug‘ilgan Shavkat, Miromon va Mirziyoning otasiga Prezident nomidan Cobalt, Qashqadaryoda tug‘ilgan Shavkat, Miromon va Mirziyolarning otasiga esa Spark berilgan edi. 2018-yilda esa Andijon, Qo‘qon va Toshkentda Shavkat, Miromon va Mirziyolar dunyoga kelgan edi. Andijonlik egizaklarning otasiga Spark, qo‘qonlik va toshkentlik egizaklarning otalariga esa Cobalt sovg‘a qilingan.
Ayni vaqtda, ismi Prezident va uning oila a’zolari sharafiga emas, boshqacha bo‘lgan uch egizaklarga biror qimmatbaho sovg‘alar topshirilgani haqida xabarlar tarqalmagan.
Izoh (0)