Zangiotada mashina quvurni urib yuborishi oqibatida salkam 40 xonadon gazsiz qoldi

Toshkent viloyatining Zangiota tumanida 30-noyabrga o‘tar kechasi yuz bergan yo‘l-transport hodisasi oqibatida bir ko‘cha aholisi vaqtincha gazdan uzilib qoldi, deya xabar bermoqda “Hududgazta’minot” kompaniyasi.

Xabar berishlaricha, Zangiota tumani “Tuyabo‘g‘iz” mahalla fuqarolar yig‘ini Bunyodkor ko‘chasini tabiiy gaz bilan ta’minlovchi quvurni avtotransport urib yuborishi oqibatida gaz sizib chiqishi holati aniqlangan.

“Ta’mirlash ishlarini zudlik bilan olib borish kerakligi sababli ko‘chadagi jami 38 ta xonadon gaz ta’minotidan vaqtincha uzilgan. Ta’mirlash tugatilgach, gaz ta’minoti qayta tiklanadi”, — deyiladi kompaniya axborotida.

“Hududgazta’minot” ta’mirlash ishlari tufayli gaz ta’minotida kuzatilayotgan vaqtincha uzilishlar oqibatida yetkazilayotgan noqulayliklar uchun aholi va gaz iste’molchilaridan uzr so‘ragan. YTH tafsilotlari ma’lum qilinmagan.