Марказий Осиё давлатлари раҳбарлари 29 ноябрь, жума куни Ислом Каримов номидаги илмий-маърифий ёдгорлик мажмуасига ташриф буюрди, деб хабар бермоқда Президент матбуот хизмати.
Қайд этилишича, Шавкат Мирзиёев, Нурсултон Назарбоев, Сооронбой Жээнбеков, Эмомали Раҳмон ва Гурбангули Бердимуҳамедов Ўзбекистоннинг Биринчи Президенти ҳайкали пойига гулчамбар қўйиб, унинг ёрқин хотирасига ҳурмат бажо келтирган.
Эслатиб ўтамиз, 29 ноябрь куни Тошкент шаҳрида Марказий Осиё давлатлари раҳбарларининг иккинчи маслаҳат учрашуви бўлиб ўтди. Саммит ишида Ўзбекистон Президенти Шавкат Мирзиёев, Қозоғистон биринчи президенти — элбоши Нурсултон Назарбоев, Қирғизистон президенти Сооронбай Жээнбеков, Тожикистон президенти Эмомали Раҳмон ва Туркманистон президенти Гурбангули Бердимуҳамедов иштирок этди.
Саммит якунида қўшма баёнот қабул қилинди ҳамда маслаҳат учрашувларига тайёргарлик кўриш ва уни ўтказиш регламенти маъқулланди. Марказий Осиё давлатлари раҳбарларининг навбатдаги маслаҳат учрашуви келгуси йили Қирғизистонда ўтказилиши белгиланди.
Самарали музокаралардан кейин Марказий Осиё давлатлари раҳбарлари Кўксарой қароргоҳидаги фахрий меҳмонлар хиёбонига кўчатлар ўтқазди.
Изоҳ (0)