27-noyabr, chorshanba kuni Sirdaryo viloyati Baxt shahrida haydovchilar yo‘lni to‘sib, gaz “zapravka”larda gaz quyilmayotganidan noroziligini namoyish qildi. Holat aks etgan video ijtimoiy tarmoqlarda tarqalganidan so‘ng Sirdaryo viloyati IIB YHXB matbuot xizmati voqea yuzasidan munosabat bildirdi.
Qayd etilishicha, 27-noyabr kuni M-34 yo‘l 89 kilometr yo‘l yoqasida joylashgan “Sheraton-servis” MChJga qarashli Avtomobillarga gaz tarqatish korxonasi oldida bir qancha fuqarolar gaz quyish shoxobchasida norozilik bildirib, shu yerda fuqarolar kutish joyidagi stullarni olib M-34 yo‘lining Toshkent—Guliston yo‘nalishini vaqtincha to‘sgan. Yo‘lda esa avtomashinalar tirband bo‘lib to‘xtab qolgan.
Voqea joyiga zudlik bilan Sirdaryo viloyati YHXB va Sirdaryo tumani IIB mas’ul xodimlari yetib borib, vaziyatni o‘rgangan.
Ma’lum bo‘lishicha, ushbu gaz tarqatish shoxobchasi bugun tongda ishga tushirilgan bo‘lib, xaydovchilar esa kechadan beri navbat kutib turgan. Soat taxminan 11:00 larda o‘zlarini “O‘zneftgaz” inspeksiyasi, MIB, “O‘ztransgaz” agentligi xodimlari deb tanishtirgan shaxslar kelib gaz hisoblash moslamasini tekshirish uchun olib ketgan. Navbatda turgan 5—6 nafar haydovchilar esa ushbu holatga o‘z noroziliklarini bildirib, M-34 yo‘lining Toshkent—Guliston yo‘nalishini berkitgan.
Sirdaryo viloyati YHXB xabarida aytilishicha, olib borilgan tushuntirish ishlaridan so‘ng u yerga yig‘ilgan haydovchilar tarqatilib, zudlik bilan yo‘lda harakat tiklangan.
Izoh (0)