“O‘zbekkonsert” rahbari: Lola 2018-yildan beri litsenziyasiz, klipi esa televideniyedagi badiiy kengashlarga qaratilgan bo‘lsa kerak

Xonanda Lola Yo‘ldosheva 2018-yil avgustidan beri litsenziyasiz xonandalik faoliyati bilan shug‘ullanib kelmoqda. Bu haqda “O‘zbekkonsert” davlat muassasasi rahbari Odil Abduqahhorov 27-noyabr kuni jurnalistlar bilan bo‘lib o‘tgan ochiq muloqotda ma’lum qildi.

Tadbirda “Daryo” muxbiri Musulmonbek Ibrohimov O‘zbekiston madaniyat vaziriga Lolaning “Sevgingni menga ayt 2” klipi yuzasidan savol bilan murojaat qilgan edi (vazir klip unga yoqmaganini tan oldi). Shundan so‘ng yangragan qo‘shimcha savol yuzasidan “O‘zbekkonsert” rahbari izoh berdi.

Lola fuqaro sifatida klip chiqardi, desak ham bo‘ladi. Qonuniy jihatdan ko‘radigan bo‘lsak, Lolaning litsenziyasi 2018-yil 29-avgustda tugagan. U bundan keyin litsenziya olib faoliyat yuritmayapti. Agar ko‘rgan bo‘lsangiz, ertasiga Instagram’dagi sahifasida sharh qoldirib, “klipda besh yil oldingi holat bo‘yicha ma’lumot berdim”, deb aytgan.

“O‘zbekkonsert” davlat muassasasi tomonidan kliplar Lolaning klipida ko‘rsatilganidek qabul qilinmaydi. “O‘zbekkonsert”da bundan ikki yil avval kliplar bo‘yicha badiiy kengash bor edi, lekin hozir u faoliyat yuritmayapti. “O‘zbekkonsert” tomonidan klipga qarab hech qachon litsenziya berilmagan va berilmaydi ham.

Ko‘pchilik buni har xil talqin qilishi mumkin, lekin Lolaning klipi televideniyelardagi badiiy kengashlar faoliyatiga qaratilgan, deb o‘ylayman.

Odil Abduqahhorov, “O‘zbekkonsert” rahbari

Ko‘p o‘tmay O‘zbekiston Xotin-qizlar qo‘mitasi raisi Elmira Bositxonova Lolani “atlasni masxaraboz kiyimi, ma’naviyat so‘zini o‘yinchoq qilish”da, Lolaning o‘zi esa ommaviy axborot vositalarini klipning “mohiyati va mazmunini o‘zgartirib, o‘z manfaati yo‘lida foydalanishga qaror qilgan”liklarida ayblab chiqqan edi.