Эрон ҳукумати норозилик намойишларидаги фитначилар орасида ИШИД аъзолари борлигини маълум қилди

Эроннинг Кармоншоҳ вилоятидаги норозилик намойишлари террорчилик ташкилотлари, жумладан, ИШИД аъзолари томонидан ташкиллаштирилгани аниқланди. Бу ҳақда Кармоншоҳ вилояти губернатори Ҳушанг Базванданинг Press TV телеканали орқали қилган баёнотига таяниб «РИА Новости» хабар берган.

«Фитначи исёнкорлар Кармоншоҳдаги кўплаб корхоналарга ҳужум уюштирган. Улар Курдистондаги озод ҳаёт парияси (PJAK), ИШИД ва «Эрон халқи мужоҳидлари ташкилоти»нинг аъзолари бўлган. Жиноятчилар шахси полиция ва хавфсизлик идоралари томонидан аниқланган ва улар қонунда белгиланган тартибда жазоланади», — дея таъкидлаган Базванд.

Губернатор намойишлар вақтида безориларнинг нафақат полиция, балки тинч аҳоли вакилларига ҳам ҳужум уюштиргани, давлат мулкига ва вилоятдаги корхоналарга жиддий зарар етказганини маълум қилган.

Эронда аҳолининг норозилик намойишлари 16 ноябрда ҳукуматнинг бензин нархини ошириш ҳақидаги қарорни имзолагани оқибатида бошланган. Эрон полицияси намойишчиларни тарқатиш учун уларга нисбатан ўқотар қуролдан фойдаланган. Норозиликлар туфайли 16 ноябрь куни Эронда интернет ўчириб қўйилди. Вашингтон Эрон ҳукуматининг мамлакатда бошланган норозиликлар туфайли интернетни ўчириб қўйганини кескин қоралади ва намойишчилар томонида эканлигини маълум қилди. Эрон бензин нархи ошгани туфайли моддий зарар кўрган аҳолига кўрилган зарарни қоплаш учун субсидиялар ажратган. Эрон олий етакчиси Али Хоманаий мамлакатда бензин нархининг ошиши сабаб бошланган халқ норозиликларини хориждаги душманларнинг фитнаси деб атаган. Эрон президенти Ҳасан Руҳоний эса ушбу норозилик намойишлари ортида мақсади мамлакат хавфсизлигига таҳдид қилиш бўлган АҚШ ҳамда Исроил турганини тахмин қилган.

Кейинчалик Эроннинг 21 та шаҳридаги норозилик намойишларида қурбон бўлганларнинг сони 106 нафарга етгани, Эрондаги норозилик намойишлари вақтида полиция қўлга туширган безорилар ўт қўйилган ҳар бир бино учун 60 АҚШ доллари миқдорида мукофотга эга бўлганини тан олган. АҚШ намойишлар вақтида интернет ўчирилгани учун Эрон алоқа вазирига нисбатан санкция қўллаган. Эрон вице-президенти Исхоқ Жаҳонгирий Яқин Шарқ минтақасидаги мамлакатларнинг мамлакатдаги норозилик намойишларида иштирок этгани аниқланса, уларга «қақшатқич зарба» берилишини ваъда қилган. АҚШ давлат департаменти эса Facebook ва Twitter’ни Эрон ҳукумати вакилларининг аккаунтларини блоклашга чақирган.