AQShning Eron bo‘yicha maxsus vakili Barayan Huk Facebook, Instagram va Twitter’ni Tehron mamlakatda internetni o‘chirgani tufayli hukumatning siyosatchilariga tegishli akkauntlarni bloklashga chaqirdi. Bu haqda “RIA Novosti” xabar berdi.
“Bu munofiqona boshqaruv tizimi. Ular internetni o‘chirib qo‘ygan, biroq o‘zlari ijtimoiy tarmoqlardan foydalanishda davom etmoqda. Biz Facebook, Instagram va Twitter kabi kompaniyalardan Eron oliy yetakchisi Ali Xamonayi, tashqi ishlar vaziri Muhammad Javod Zarif va prezident Hasan Ruhoniyning akkauntlarini ular mamlakatda internetni qayta yoqmaguniga qadar bloklab qo‘yishni taklif qilaman”, — deya ta’kidlagan Huk.
“Eron hukumati internetni o‘chirib qo‘yganining asosiy sababi mamlakatdagi minglab odamlarning norozilik namoyishlari oqibatidagi o‘limlar va fojiali holatlarni yashirishga urinish deb baholash mumkin”, — deydi u.
Mavzuga doir: Eron raketa zaxirasi Yaqin Sharqdagi boshqa davlatlarnikidan ko‘p ekani ma’lum qilindi
Eronda internet 17-noyabr kuni 15-noyabrda benzin narxining oshirilishi tufayli boshlangan norozilik namoyishlari oqibatida o‘chirib qo‘yilgan. 21-noyabr, payshanba kuni hukumatning mamlakatda internetni qayta ishga tushirgani xabar qilingan. Ushbu xabardan keyin AQSh davlat kotibi Mayk Pompeo forslardan davlat departamentiga namoyishlar bilan bog‘liq fotosuratlar, videolar va boshqa axborotlarni yuborishni so‘ragan.
Izoh (0)